Heimild til hópmálssóknar mikil réttarbót

Heimild til hópmálssóknar er nú loks í augsýn á Íslandi, en fyrir Alþingi liggur nú frumvarp um breytingu á lögum um meðferð einkamála sem opnar fyrir hópmálsóknir. Þetta er mikil réttarbót fyrir íslenska neytendur - enda hefur Talsmaður neytenda lagt áherslu á þessa lagabreytingu.

Það eru allar líkur á að frumvarpið verði samþykkt á næstu dögum enda þverpólitísk samstaða nú um málið.

Blaðamönnum og þingmönnum mútað af bönkunum?

"Rannsóknarnefnd Alþingis, sem á að grafast fyrir um orsakir bankahrunsins, ætlar að rannsaka hvort stjórnmálamenn eða fjölmiðlamenn hafi fengið sérstaka fyrirgreiðslu í bankakerfinu. Páll Hreinsson, formaður nefndarinnar, segir að ábending hafi komið innan úr bankakerfinu um að einhver eða einhverjir úr þessum hópi hafi fengið óeðlilega fyrirgreiðslu hjá bönkunum. Þetta eigi við þingmenn, fyrrverandi þingmenn og ýmsa fjölmiðlamenn. Kanna á tímabilið frá 2004 til 2008."

Svo hljóðar hluti fréttar á www.visir.is.

Þótt ég hafi oft verið undrandi á hlutdrægni fjölmiðlamanna þegar ég var að verjast rangfærslum bankanna gagnvart Íbúðalánasjóði á sínum tíma - þá hafði ég ekki hugmyndaflug til að láta mér detta í hug mögulega óeðlilega fyrirgreiðslu í bönkunum til handa fjölmiðlamönnum!

Heitir það ekki mútur á íslensku?

Eva Joly ráðleggur ríkisstjórn

Jóhanna formaður forsenda stjórntækrar Samfylkingar

Jóhanna Sigurðardóttir verður að gefa kost á sér sem formaður Samfylkingarinnar við núverandi ástæður. Það er forsenda þess að Samfylkingin verði stjórntæk í kjölfar kosninga.

Tvíhöfða þurs í forystu Samfylkingar er ekki það sem þjóðin þarfnast.

Jóhanna er óumdeildur leiðtogi Samfylkingarinnar um þessar mundir. Borgarfulltrúi eða fyrrum bæjarstjóri geta aldrei verið trúverðugir eða traustir formenn þessa dagana. Þess vegna á hún að taka kaleikinn - strákarnir verða að bíða í 2-3 ár í viðbót.

Þrýstingur á Jóhönnu vex

Sigurður Ingi og Eygló öflugt pólitískt par

Sigurður Ingi og Eygló Harðardóttir eru öflugt pólitískt par sem hafa víða skírskotun á Suðurlandi. Suðurnesjamaðurinn Eysteinn Jónsson klárar það sem klára þarf hvað það varðar. Sem "gamall tímabundinn Hornfirðingur" bíð ég eftir þingmannsefni úr Austur-Skaftafellsýslu - en hann kemur bara síðar!

Framsóknarflokkurinn á að ná góðum árangri á Suðurlandi með þennan lista.

En ég vil minna Sigurð Inga og aðra frambjóðendur Framsóknarflokksins á að þau hafa verið valin til þess að framfylgja stefnu Framsóknarflokksins sem ákvörðuð var á síðasta flokksþingi. Þar er mikilvægt að hafa í huga það sem ég bloggaði um í morgun: Evrópustefna Framsóknar skýr - aðildarviðræður með skýrum markmiðum

 

Sigurður Ingi í fyrsta sæti

Evrópustefna Framsóknar skýr - aðildarviðræður með skýrum markmiðum

Evrópumál og gjaldmiðilsmál munu verða eitt af stóru kosningamálunum. Frambjóðendur Framsóknarflokksins hafa skýra stefnu í þeim málum eftir glæsilegt flokksþing á dögunum.

Framsóknarmenn vilja aðildarviðræður með skýrum markmiðum.

Leiðtogar allra framboðslista Framsóknarflokksins ber skylda til þess að berjast fyrir aðildarviðræðum við Evrópusambandið á grunni eftirfarandi ályktunar flokksþings Framsóknarflokksins:

Ályktun um aðildarviðræður við Evrópusambandið

Markmið

Að Ísland hefji aðildarviðræður við Evrópusambandið á grundvelli samningsumboðs frá Alþingi sem tryggi hagsmuni almennings og atvinnulífs og þá sérstaklega sjávarútvegs og landbúnaðar.

Þá er fullveldi og óskorað forræði Íslendinga yfir auðlindum þjóðarinnar grundvallarkrafa í þeim viðræðum. Viðræðuferlið á að vera opið og lýðræðislegt og leiði viðræðurnar til samnings skal íslenska þjóðin taka afstöðu til aðildarsamnings í þjóðaratkvæðagreiðslu í kjölfar upplýstrar umræðu.

Skilyrði

• Skýr og einhliða úrsagnarréttur, sem er þegar viðurkenndur í aðalsáttmála ESB, verði hluti aðildarsamnings.

• Staðfest verði að Íslendingar einir hafa veiðirétt innan íslenskrar fiskveiðilögsögu og að fiskveiðistjórnun verði áfram innanríkismál Íslendinga, enda styðjist hún við reglur ESB um stöðug hlutföll, nálægðarreglu og Lúxemborgarsamkomulagið. Ísland verði sjálfstæður aðili að samningum um flökkustofna.

• Fæðuöryggi þjóðarinnar verði tryggt og viðurkennd nauðsyn á sérstökum ákvæðum vegna fámennis þjóðarinnar.

• Viðurkennt verði að íslenskur landbúnaður sé heimskautalandbúnaður.

• Framleiðsla og úrvinnsla íslenskra búfjárstofna verði tryggð ásamt sérstöðu og hreinleika íslenskra búfjárstofna.

• Staðfest verði að vegna aðstæðna á Íslandi og fámennis þjóðarinnar hafi Íslendingar varanlegan rétt til að setja lög um forgangsrétt manna með lögheimili og fasta búsetu á Íslandi til að eiga ráðandi hlut í jarðeignum, lóðum, fasteignum og atvinnufyrirtækjum, enda styðjast slík ákvæði við núgildandi reglur á Álandseyjum, Möltu, Azoreyjum og víðar innan ESB.

• Í upphafi viðræðna verði gerður stöðugleikasamningur við Evrópska seðlabankann sem tryggi stöðugt gengi íslensku krónunnar þar til Íslendingar taka upp evru.

• Tekið verði tillit til stöðu íslensks efnahagslífs við umbreytingu peninga- og gjaldeyrismála á Íslandi.

• Ákvæði verði um varðstöðu um íslenska þjóðmenningu, þjóðtungu og þjóðhætti á Íslandi. Íslenska verði viðurkennt sem eitt hinna opinberu tungumála ESB.

 

Fyrstu skref

Þessi helstu samningsmarkmið, sem og önnur sem skilgreind verða í samvinnu hagsmunaaðila og stjórnvalda, með sem víðtækastri samstöðu, verði lögð til grundvallar því umboði sem samninganefnd Íslendinga fari með í samningaviðræður við Evrópusambandið.

Siv efst í SV-kjördæmi

Verð ekki í framboði eins og ég stefndi að

Ég mun ekki vera í framboði fyrir Framsóknarflokkinn fyrri næsti Alþingiskosningar. Uppstillinganefnd stillti Vigdísi Hauksdóttur upp í 1.sæti Reykjavík suður, en ég sóttist eftir því sæti. Í atkvæðagreiðslu um 1. sætið í Reykjavík suður fékk Vigdís 50,2% og skipar því það sæti fyrir Alþingiskosningar.

Sigmundur í Reykjavík norður

Samsvarandi öllum útlánum Íbúðalánasjóðs

Stærstu eigendur Kaupþings létu bankann lána sjálfum sér 500 milljarða. Þegar fjárhæðirnar eru orðnar þetta háar þá missum við oft tilfinninguna fyrir þeim. En til þess að setja þessi ofurlán í samhengi þá er þessi fjárhæð svipuð og öll útlán Íbúðalánasjóðs til íbúðarhúsnæðis.

Þetta er náttúrlega ekki í lagi.

Stenst þetta lög og reglur?

Talandi umlög og reglur - þá er það óþolandi að síðasta ríkisstjórn hafi ekki sett strax sérstakan saksóknara í bankahrunsmálið. Þá hefði verið unnt að frysta eignir auðmanna sem hefðu legið undir grun um að hafa brotið lög strax í nóvember - desember.

Nú eru líkur á að fennt sé í slóðina - en við vonum að hinn yfirvegaði saksóknari sem loks var settur til að skoða bankahrunið og möguleg lögbrot því tengdu - nái að rekja þessa slóð og afla gagan til að sækja þá sem brotið hafa lög til saka.

Undirstrika að með þessu er ég ekki að segja að þeir sem fjallað er um í þessari frétt Moggans hafi brotið lög - ég veit bara ekkert um það - það er saksóknarans að finna út úr því.

En að lána sjálfum sér 500 milljarða  ... það er dálítið bratt!

 

500 milljarðar til eigenda

Hræðsla stjórnmálamanna við stjórnlagaþing aumkunarverð

Hræðsla ýmissa stjórnmálamanna við stjórnlagaþing þjóðarinnar er aumkunarverð. Þessir stjórnmálamenn leita allra leiða til að koma í veg fyrir að það verði þjóðin sem kjósi stjórnlagaþing beint og að það verði þjóðin sem samþykki nýja stjórnarskrá.

Þeir hafa reynt að fá stjórnlagaþinginu breytt í ráðgefandi þing svo þeir geti snyrt til tillögur að nýrri stjórnarskrá í takt við eigin vilja og hagsmuni.

Þeir hafa reynt að tefja málið og sagt að það sé ekki tímabært.

Þeir reyna nú að slá stjórnlagaþing þjóðarinnar af með því að hræða kjósendur með því að reikna kostnað við stjórnlagaþingið upp í rjáfur.

En frumvarp og tillaga Framsóknarflokksins um stjórnlagaþing þjóðarinnar án aðkomu alþingismanna og ráðherra stendur.

Það er rétta leiðin.

Telur stjórnlagaþing kosta meira en milljarð

Nýtt húsnæðisbótakerfi frá grunni!

Bull og vitleysa er það nú að fara að tjasla upp á vaxtabótakerfið og húsaleigubótakerfið.

Í stöðunni eins og hún er nú á að sjálfsögðu að stokka núverandi húnsæðisbótakerfi upp og skapa nýtt, markvissara og betra húsnæðisbótakerfi sem byggir á jafnræði milli búsetuforma og taki mið af heildarstöðu fólks ekki skuldum og vaxtabyrði eingöngu.

Ég hef margoft bent á endurskipuleggja þurfi húsnæðisbótakerfið þannig að um verði að ræða eitt húsnæðisbótakerfi sem gerir ekki greinarmun á búsetuformum, það er húsnæðisbæturnar séu þær sömu hvort sem um er að ræða fjölskyldur sem búa í eigin húsnæði, í leiguhúsnæði eða búseturéttarhúsnæði.

Reyndar tekur flokksþing Framsóknarflokksins undir með mér eins og sjá má í ályktun flokksþings um húsnæðismál sem hljóðar svo: 

Markmið

Allir landsmenn skulu búa við öryggi í húsnæðismálum í samræmi við hóflegar þarfir hvers og eins og hafa raunverulegt val um búsetuform.

Leiðir

• Íbúðalánasjóður gegni áfram hlutverki sínu sem kjölfestan í íbúðalánakerfi landsmanna.

• Íbúðalánasjóði verði heimilt að stofna dótturfélög til að ná markmiðum sínum og koma til móts við alþjóðlegar skuldbindingar.

• Íbúðalánasjóði verði gefið svigrúm til samvinnu við aðrar fjármálastofnanir um þróun íbúðalánamarkaðarins.

• Komið verði á fót nýju húsnæðisbótakerfi í stað núverandi kerfis vaxtabóta og húsaleigubóta.

• Sett verði á fót ný fjármögnunarleið fyrir ungt fólk sem byggi á frjálsum sparnaði og opinberu framlagi sem geti jafnt nýst til innborgunar við kaup á íbúð eða til kaupa á búseturétti.

• Staða samvinnufélaga á sviði húsnæðismála verði styrkt.

• Áhersla verði lögð á fjölgun lífshlaupsíbúða þar sem hönnun tekur mið af mismunandi þörfum fólks á mismunandi aldurstigi og meðal annars tryggt að unnt sé að athafna sig í hjólastól. Markmiðinu verði náð með efnahagslegum hvata.

Fyrstu skref

Gerðar verði breytingar á reglugerð um greiðsluerfiðleikaúrræði Íbúðalánasjóðs þar sem heimilað verði að ákveðið fast hlutfall heildartekna fjölskyldna og einstaklinga sem eru í greiðsluerfiðleikum renni til greiðslu íbúðalána, þó þannig að jafnræðis sé gætt. Þetta úrræði nái jafnframt til annarra lánastofnana.

Undirbúið verði frumvarp um breytingar á lögum um húsnæðismál sem tryggi stöðu Íbúðalánasjóðs til frambúðar og heimild verði veitt til stofnunar dótturfélaga sjóðsins í hlutafélagaformi og samstarfs við aðrar fjármálastofnanir.

Lagt verði fram frumvarp til laga um frjálsan sparnað ungs fólks og mótframlags ríkisins vegna kaupa á húsnæði, búseturétti eða framlags í byggingarsamvinnufélag.

Settur verði á fót hópur sem fer yfir gildandi lög um húsnæðissamvinnufélög og gildandi lög um byggingarsamvinnufélög og vinni frumvarp að breytingum á núverandi lögum ef ástæða er talin til.

 

 

Hækki skatta og tvöfaldi vaxtabætur

Jákvætt skref Íslandsbanka gott fyrir heimilin - en bankinn hagnast!

Íslandsbanki hefur tekið afar jákvætt skref sem er gott fyrir heimilin í landinu með því gefa kost á að afborganir af myntlánum miðist við gengisvísitölu í upphafi árs 2008 og mismunurinn leggist aftan við lánið sem lengist því um einhvern tíma.

Þannig lækkar greiðslubyrði heimilanna á meðan þau berjast í gegnum þá efnahagslægð sem nú ríkir.

Á móti má segja að afborganir af myntlánum ríkisbankanna séu allt of háar þar sem afborganir undanfarinna mánaða hafa miðað við óeðlilega lágt gengi íslenski krónunnar á sama tíma og ekki er verið að greiða lánadrottnum bankanna lánin til baka þar sem gömlu bankarnir eru í greiðslustöðvun og fjármögnunarlánin - skuldir bankanna vegna íbúðalánanna - ennþá hjá þeim.

Ríkisbankarnir eru því að líkindum að hagnast verulega á afborgunum af myntlánum undanfarinna mánaða því litlar sem engar líkur eru á að ríkisbankarnir endurgreiði þeim sem fjármögnuðu myntlánin á sama lága gengi íslensku krónunnar og viðskiptavinir hafa verið að greiða.

Þannig mætti færa rök fyrir því að ríkisbankarnir ættu að skila heimilunum til baka mismuninum á þeim háu afborgunum sem þau hafa greitt þar sem krónan er skráð lág og gengisvítitalan er há - og þeim afborgunum sem bankarnir munu væntanlega greiða lánadrottnum sínum á sterkara gengi krónunnar og lægri gengisvísitölu.

Að óbreyttu munu bankarnir því hagnast verulega á lágu gengi krónunnar undanfarið - og Íslandsbanki tryggir sér klárlega hagnað á því að lengja í lánunum í stað þess að ganga að fjölskyldunum af fullri hörku.

Úrræði Íslandsbanka er reyndar ekki alveg óþekkt á Íslandi hvað gjaldeyrislán varðar. Ég veit ekki betur en SPRON hafi fært hluta afborgana af gjaldeyrislánum einstaklinga aftur fyrir lánstímann til að halda eðlilegri greiðslubyrði þegar krónan féll illilega árið 2001.

Þá hefur frysting og lenging lána lengi tíðkast hjá Íbúðalánasjóði.

Ný lausn erlendra lána