Siv flott í gervi tannálfsins!

Það er gott að sjá Siv í gervi tannálfsins og tryggja tannlæknaþjónustu og forvarnarskoðanir þriggja og tólf ára barna með þessum samningi við Tannlæknafélagið.

Það er ekki hvað síst mikilvægt að það náist nýir samningar við tannlæknafélagið - en mér skilst að það hafi verið erfitt að ná samkomulagi við tannlæknana um ýmislegt annað þrátt fyrir ítrekaðar tilraunir undanfarin misseri.

Í yfirlýsingu sem fylgir undirrituninni segir m.a.:

Það er sameiginlegur skilningur samningsaðila að með þessu sé stigið fyrsta skrefið í forvarnareftirliti barna og unglinga, sem leggja mun grunn að bættri tannheilsu barnsins um alla framtíð. Í framtíðinni verður hugað að því að þétta þetta eftirlitsnet með því að taka fleiri árganga inn til eftirlits á þennan hátt.

Þetta er gott því betur má ef duga skal!

Bendi á fyrra blogg mitt um þessi mál, Tannálf í skólann, takk!

Samið um tannlæknaþjónustu og forvarnarskoðanir 3 og 12 ára barna

Samfylkingin hefur eytt meiru en Framsókn - eins og síðast!

Samfylkingin eyddi meiru en Framsóknarflokkurinn í auglýsingar fyrir kosningarnar fyrir 4 árum. Það kom í ljós þegar málin voru gerð upp eftir kosningarnar.  Þrátt fyrir þetta hefur Framsóknarflokkurinn verið skotspónn vegna auglýsinga sinna - en ekki Samfylkingin.

Það sama virðist upp á teningnum núna. Samfylkingin hefur eytt meiru en Framsókn - en samt er það Framsóknarflokkurinn sem hefur verið skotspónn vegna auglýsinga sinna.

Ég geri ráð fyrir að flokkarnir muni allir eyða svipuðum fjárhæðum þegar upp verður staðið í vor - en það kæmi mér ekki á óvart að áfram verði haldið á lofti þjóðsögunni um dýrar auglýsingaherferðir Framsóknarflokksins - þótt staðreyndir sýni annað.

Reyndar tel ég eðlilegan og mikilvægan þátt lýðræðisins að stjórnmálaflokkar kynni árangur sinn og stefnu í auglýsingum fyrir kosningar. Almenningur á rétt á því.

Ný framboð verða einnig að geta komið stefnumálum sínum á framfæri við kjósendur í formi auglýsinga.

Eins og fyrirkomulagið er nú - þá getur það verið erfitt.

Mér finnst því eðlilegt að það verði skoðað að ný framboð sem fram koma með framboðslista í öllum kjördæmum eigi vísan tilgreindan stuðning úr sameiginlegum sjóðum landsmanna vegna kynningarmála.  Þótt einhverjum virðist það bruðl - þá verðum við að horfast í augu við það að lýðræði kostar peninga. Þá peninga eigum við ekki að spara.

Capacent: Auglýsingakostnaður Framsóknarflokksins ofreiknaður

Verkó - ótrúlegt afrek á sínum tíma!

Ég efast um að Íslendingar nútímans sem flestir búa við mikla velmegun og telja það eðlilegt að yfir 80% þjóðarinnar eigi eigið húsnæði geri sér grein fyrir því ótrúlega afreki sem fólst í byggingu verkamannabústaðana vestur í bæ fyrir 75 árum. Það er himinn og haf milli kjara fólks á þeim tíma og ofgnóttarinnar í dag.

Það er ekki tilviljun að stytta af hinum öfluga baráttumanni og alþýðuleiðtoga Héðins Valdimarssonar er að finna á leikvellinum við verkamannabústaðina við Hringbrautina. Héðinn sem var bæjarfulltrúi og þingmaður Alþýðuflokksins á þessum árum flutti á Alþingi árið 1928 fram frumvarp  um verkamannabústaði sem samþykkt var á vorþinginu árið eftir fyrir tilstyrk Alþýðuflokks og Framsóknarflokks.

Á grundvelli laganna stofnaði Héðinn og félagar hans Byggingarfélag verkamanna í Reykjavík sem stóð fyrir byggingu verkamannabústaðanna sem teknir voru í gagnið fyrir 75 árum. Sú framkvæmd var fyrsta skrefið í merkilegri sögu verkamannabústaða á Íslandi sem gerði, ásamt byggingasamvinnufélögunum, alþýðufólki kleift að búa í eigin sómasamlegu húsnæði sem annars hefði að líkindum ekki orðið raunin.

75 ár frá því flutt var í verkamannabústaðina í Vesturbæ

Herdís Sæm með öldungunum á þing!

Það er alveg ljóst af hverju eldri borgarar buðu ekki fram undir eigin merkjum í Norðvesturkjördæmi! Það var ekki pláss fyrir fleiri öldunga en þegar voru fyrir  í fyrstu sætum framboðslista Sjálfstæðisflokks, Frjálslyndaflokksins og Vinstri grænna! 

 Framsóknarflokkurinn er greinilega flokkur unga fólksins og þeirra sem eru að nálgast miðjan aldur - eins og ég - í þessu kjördæmi!  Reyndir og vandaðir stjórnmálamenn eins og Maggi Stefáns - sem staðið hefur sig afbragðs vel í félagsmálaráðuneytinu og Herdís Sæmundardóttir sem komin er með mikla og góða reynslu á ýmsum sviðum stjórnmálanna - eru bara unglingar við hliðina á þessum rosknu köllum!  Þá er ekki verra að hafa Valdimar á Glitstöðum - kornungan manninn með í þessum hóp!

Þegar kjósendur á slóðum föðurfjölskyldu minnar í Hnappadalnum og þar um kring - ásamt kjósendum annars staðar í þessu víðfeðma kjördæmi - taka lokaákvörðun um hvar skuli setja exið á kjörseðilinn - þá ættu þeir að bera saman þessa ágætu öldunga sem væntanlega sumir eru öryggir á þing - og Herdísi Sæmundardóttur - sem þarf örfá atkvæði til viðbótar til að tryggja sér þingsæti.

Atkvæði alvöru unga fólksins og kvenréttindafólksins í kjördæminu ættu að lenda framan við B-ið - því þótt öldungurinn Jón Bjarnason segist vera feministi og haldinn ungmennafélagshugsjón - þá ber það keim af eftirlíkingu! Betra að kjósa orginalinn - Herdísi Sæm!

En svona í lokin - sjáið öldungadeildina í norðvestrinu sem ungir Framsóknarmenn í Skagafirði settu svo snyrtilega upp á vefsíðu sinni:

 

 Einar Oddur Kristjánsson 65 ára þriðja sæti Sjálfstæðisflokksins í NV. Hefur setið á alþingi síðan 1995.

•  Guðjón A. Kristjánsson 63 ára oddviti Frjálslyndaflokksins í NV. Hefur setið á Alþingi síðan 1999 og varaþingmaður þar áður fyrir Sjálfstæðisflokkinn.
•  Sturla Böðvarsson 62 ára oddviti Sjálfstæðismanna í NV. Hefur setið á Alþingi síðan 1991. Og varamaður frá 1984
•  Jón Bjarnason 64 ára oddviti Vinstri Grænna í NV. Hefur setið á Alþingi síðan 1999.