Velferðarráð vill semja við SÁÁ um rekstur á nýju búsetuúrræði

Velferðarráð Reykjavíkur fól á dögunum Velferðarsviði Reykjavíkurborgar að ræða við SÁÁ um um rekstur á nýju búsetuúrræði með félagslegum stuðningi fyrir allt að 20 manns á grundvelli tilboðs sem SÁÁ lagði fram fyrir nokkru. Mikill vilji er innan Velferðarráðs að SÁÁ taki að sér þetta mikilvæga verkefni.

Félagsmálaráðuneytið kemur einnig að þessu verkefni með Velferðarráði Reykjavíkurborgar.

Um er að ræða búsetuúrræði fyrir einstaklinga sem hafa hætt neyslu áfengis og eða vímuefna, en þurfa á umtalsverðum stuðningi að halda til að geta tekið virkan þátt í samfélaginu.

Hið nýja búsetuúrræði  verður ekki einungis tímabundið heimili þeirra einstaklinga sem þar munu búa heldur er ætlunin að þar fari fram öflug virkniþjálfun svo heimilismenn geti síðar haldið út í lífið og staðið þar á eigin fótum.  Eðli málsins vegna þurfa þeir í fyrstu á miklum félagslegum stuðningi að halda en sá stuðningur mun væntanlega minnka þegar færnin til að taka þátt í samfélaginu eykst og að lokum geta einstaklingarnir flutt út í samfélagið að nýju.

Þess vegna  er mikilvægt að heimili fólksins sé í nánd við hið daglega líf samfélagsins í Reykjavík en ekki fjarri daglegu amstri.
Það er afar mikilvægt að vandað sé til verka þegar gengið er frá samningum Reykjavíkurborgar við utanaðkomandi aðilja um rekstur búsetuúrræðis sem þessa.

Í slíkum samningum verður Velferðarráð og Velferðarsvið að tryggja ákveðin grunnatriði:

1.    Rekstraraðili hafi þekkingu og reynslu af eftirmeðferð og virkniþjálfun vegna áfengis- og vímuefndavanda

2.    Rekstraraðili sé fjárhagslega ábyrgur

3.    Húsnæði fyrir heimilið sé tryggt

4.    Velferðasvið Reykjavíkurborgar hafi tryggt eftirlit með starfseminni

5.    Velferðarsvið Reykjavíkurborgar ákveði í samráði við rekstraraðila hverjir fá notið umræddrar þjónustu

Það er ljóst að SÁÁ uppfyllir fyrstu tvö skilyrðin og getur gripið til ráðstafana til að uppfylla einnig það þriðja.

Síðustu tvö skilyrðin sem eðli málsins vegna hljóta að vera eðlilega krafa Reykjavíkurborgar og Félagsmálaráðuneytisins þegar leitað er til utanaðkomandi aðilja um rekstur búsetuúrræðis sem þessa og er greitt af almannafé. Enda ætti að vera einfalt að ganga frá slíkum sjálfsögðum atriðum í samningi um reksturinn sem nú er verið að vinna að með SÁÁ.

Hallur Magnússon

Varaformaður Velferðarráðs

Athugasemdir

[Haraldur Bjarnason, 14.10.2008 kl. 19:59]

Það er gott Hallur að þetta velferðarráð í Reykjavíkurhreppi skuli loks sjá að sér. Því átti að vera ljóst strax í upphafi að SÁÁ var færast til að sjá um þessi mál. Ekki veit ég hve margir skkjólstæðingar þessa svokallaða "Velfarðarráðs" þarna syðra eru ekki okkar á meðal ennþá en grunar að þeir séu nokkrir. En góðs viti að loks skuli tekið skynsamlega á málum og eiginhagsmunir sumra þarna í hreppnum og einkavinavæðingin hafi beðið skipbrot. Kannski hefur ástandið í þjóðfélaginu núna fengið fólk til að hugsa.

[Baldvin Jónsson, 14.10.2008 kl. 21:29]

Ég er sammála þér Hallur með þessi fyrstu fjögur atriði. Heldur finnst mér þó langt seilst með það fimmta. Það að verkkaupinn hafi rétt til eftirlits skv. 4. lið á að uppfylla aðkomu hans fyllilega.

Það er ekki hægt í svona rekstri að utanaðkomandi aðilar séu að vasast í því hverjir fái inni og hverjir ekki. Það verður að treysta rekstraraðilum stofnunarinnar til þess. Endum annars bara í pólitísku poti fremur en að það sé faglega farið yfir hverjir komist að.