Samvinnuskólinn 90 ára og Hollvinasamtök Bifrastar 50 ára

Samvinnuskólinn sem í áranna rás hefur þróast í öflugan háskóla sem ber nú heitið Háskólinn á Bifröst er 90 ára á þessu ári. Þá eru tímamót hjá Hollvinasamtökum Bifrastar sem byggja á 50 ára grunni.

Mér hlotnaðist sá heiður að vera kosinn formaður Hollvinasamtaka Bifrastar á aðalfundi félagsins í gær á 50 ára afmælisári samtakanna. Það verður spennandi að taka þátt í afmælisárinu, en ekki síður að fá tækifæri til þess að leggja mitt af mörkum ásamt meðstjórnendum mínum í Hollvinasamtökunum til að styðja við bak Háskólans á Bifröst sem reyndar hét Samvinnuháskólinn þegar ég stundaði þar nám 1993-1995.

Það var þann 14. september 1958 að nemendur útskrifaðir frá Samvinnuskólanum að Bifröst stofnuðu Nemendasamband Samvinnuskólans, skammstafað NSS.  Í frétt frá þeim fundi segir m.a. “tilgangur með stofnun NSS er að treysta bönd gamalla nemenda við skóla sinn og efla kynni og skilning milli eldri og yngri nemenda.”   

Á aðalfundi NSS í janúar 1999 urðu þau þáttaskil að lögum þess Nemendasambandsins var breytt og sambandið varð hollvinasamtök sem treysta skyldu bönd yngri og eldri nemenda, efla kynni þeirra og síðast og ekki síst yrðu samtökin bakhjarl alls skólastarfs að Bifröst.

Þá var einnig veitt heimild í lögunum til að starfsmenn skólans og fyrrverandi starfsmenn ásamt öllum þeim sem áhuga hefðu á að vinna að markmiðum sambandsins gæfist kostur á að gerast félagar.

Á aðalfundi samtakanna sem haldinn var þann 27. nóvember 2006 var lögunum enn breytt nokkuð og þau aðlöguð nýjum aðstæðum.  Meðal annars var nafni samtakanna breytt í Hollvinasamtök Bifrastar og einnig er í nýju lögunum ákvæði um að allir nemendur sem útskrifast hafa úr Samvinnuskólanum, Samvinnuháskólanum, Viðskiptaháskólanum á Bifröst og Háskólanum á Bifröst séu sjálfkrafa félagar í Hollvinasamtökunum nema þeir óski eftir að vera það ekki. 

Núgildandi lög samtakanna eru birt í heild sinni á vefsíðu samtakanna.

Félagar í Hollvinasamtökum Bifrastar eru nú um 2.500  talsins og má finna nöfn þeirra á vefsíðu samtakanna undir liðnum félagaskrá.  Það gæti verið skemmtileg afþreying að skoða nafnalistann og sjá hve margir þjóðþekktir Íslendingar hafa verið á Bifröst - og í gamla Samvinnuskólanum í Reykjavík!

Dagskrá með helstu atburðum er snerta 90 ára afmæli Samvinnuskólans - nú Háskólans á Bifröst - og 50 ára afmæli Nemendasambands Samvinnuskólans - nú Hollvinafélags Bifrastar - má sjá hér.

Ég skora á alla Bifrestinga að taka þátt í starfi Hollvinasamtakanna og leggja sitt af mörkum til að styðja við bak Háskólans á Bifröst - háskóla sem byggir á afar merkilegri 90 ára sögu Samvinnuskólans og Samvinnuháskólans.

Athugasemdir

[Hallur Magnússon, 13.6.2008 kl. 10:04]

.

[Guðrún Alda Elísdóttir (IP-tala skráð) 13.6.2008 kl. 10:17]

Ég tek undir hvatningarorð Halls. Bifrestingar! Takið frá laugardaginn 13.september nk. Þann dag verður afmælishátíð Hollvinasamtakanna á Bifröst. Dagskráin verður auglýst nánar á heimasíðu samtakanna www.hollvinir.bifrost.is

[Bifrestingur (IP-tala skráð) 13.6.2008 kl. 21:01]

Þessu til viðbótar þá finnst mér vert að nefna að í nú í haust eru 20 ár liðin síðan nám á háskólastigi hófst við skólann.  Þá hófu 32 nemendur nám í rekstrarfræði og um 20 nemendur nám við frumgreinadeild.  Fyrsta útskrift skólans á Bifröst á háskólastigi var síðan vorið 1990.    20 ára afmæli skólans sem háskóla finnast mér jafn merk tímamót og 90 ára afmæli skólans sjálfs.

[Guðmundur Jónas Kristjánsson, 16.6.2008 kl. 01:19]

Hugsa til 13 sept og hvet minn árgang frá 1971 til að mæta.

Með samvinnukveðju Hallur minn !

Bifrestingurinn Guðm.Jónas frá 1971

[Anna Sigurðardóttir (IP-tala skráð) 16.6.2008 kl. 09:09]

Til hamingju með formanninn Hallur - þetta er hið besta mál.  Já það er um að gera að hvetja alla til að taka 13. sept. frá og mæta öll!  Við í mínum árgangi (1980) fáum samviskusamlega fréttir  frá Þóri Páli í gegnum okkar bekkjarfulltrúa - það er gaman og viðheldur tengslum.