Yfirvegun Guðlaugs Gylfa skilar hærra auðlindagjaldi frá Magma Energy

Það hefur verið aðdáunarvert hvernig formaður Orkuveitu Reykjavíkur Guðlaugur Gylfi Sverrissons hefur haldið á málum vegna fyrirhugaðrar sölu á hlut Orkuveitu Reykjavíkur til Magma Energy. Ekki hvað síst eftir upphlaup fulltrúa Samfylkingar í stjórn Orkuveitunnar sem hélt fram hreinum rangfærslum í fjölmiðlum og í kjölfarið stóryrtar yfirlýsinga ráðherra VG sem greinilega töldu sig geta komið höggi á meirihluta Framsóknarflokks og Sjálfstæðsiflokks í borgarstjórn Reykjavíkur með upphlaupinu. 

Ekki gleyma að Orkuveitan var skikkuð af samkeppnisyfirvöldum til að selja hlut sinn í HS Orku þannig að Orkuveitunni var nauðugur einn kostur að selja - og hafði náð samningum við hæstbjóðanda - samningi sem tryggði eigendum Orkuveitu Reykjavíkur - okkur Reykvíkingum og fleirum - dýrmætt erlent fjármagn á krepputímum það sem lítið er um slíkt.

Í stað þess að taka þátt í póltísku moldviðri ráðherra VG og fulltrúa Samfylkingarinnar í stjórn Orkuveitunnar tók Guðlaugur Gylfi á málinu af yfirvegaðri stillingu og kom málinu í þann farveg að veita ríkinu kost á koma að málinu og gera tilboð um kaup á þeim hlut sem Orkuveitan hyggst selja Magma Energy.

Það kom strax í ljós að háværar kröfur VG um að hluturinn ætti að vera áfram í íslenskri opinberri eigu - sem eðli málsins gat ekki verið í eigu Orkuveitu Reykjavíkur vegna úrskurðar samkeppnisyfirvalda - voru innantómar og fyrst og fremst ætlaðar til að skaða meirihluta Framsóknarflokks og Sjálfstæðisflokks í borgarstjórn. Það var aldrei innistæða hjá fjármálaráðherra fyrir því að veita fjármagni til þess að ríkið gæti tekið yfir hlut sem selja á Magma í HS orku.

Það jákvæða við moldvirði VG er að aðkoma fjármálaráðherra mun væntanlega verða til þess að umdeilanlegt ákvæði um þann tíma sem leigutími HS Orku á jarðvarmaauðlindum á Reykjanesi mun styttast og auðlindagjald hækka.

Sú niðurstaða verður til þess að fjármálaráöherra - sem er klókur og öflugur stjórnmálamaður - getur haldið andlitinu. Það er gott - bæði fyrir ráðherrann, Orkuveitu Reykjavíkur, HS Orku og Magma Energy.

En ekki gleyma því að það voru yfirveguð viðbrögð Guðlaugs Gylfa Sverrissonar formanns Orkuveitu Reykjavíkur sem gerðu þessar jákvæðu breytingar kleifar.

Vilja hækka auðlindagjald

Athugasemdir

[Hallur Magnússon, 28.8.2009 kl. 08:58]

Kristinn!

Takk fyrir mikilvæga athugasemd.

[Jónas Gunnlaugsson (IP-tala skráð) 28.8.2009 kl. 16:04]

Við höfum selt jarðvarma orkuna til almennings á kostnaðarverði, af því að við áttum orkulindirnar sjálfir Sá sem ræður orkulindunum ræður orkuverðinu. Ef einkaaðilar eiga orkulindirnar, verður orkan seld á heimsmarkaðs verði. Jarðhita orkusvæði er mun verðmætara en olíulindir. Olíulindir tæmast, en í jarðhita svæðinu borar þú dýpra og dælir vatni niður, og getur haldið áfram nýtingunni. Þegar hlutabréf eru seld, er miðað við undirliggjandi verðmæti, á heimsmarkaðsverði. Þá verður að selja orkuna á heimsmarkaðsverði líka. Þá er spurning hvort við getum rekið sundstaðina, ef við verðum að greiða olíu verð fyrir orkuna. Það þarf að koma í veg fyrir að sveitastjórnir geti selt jarðhita orkulindirnar. Þær þurfa að vera í almanna eigu, og ekki hægt að leigja, selja eða taka þær upp í skuld. Venjan er að sveitarstjórnum er lánað til að byggja íþróttahús, skóla, leikskóla, bara nefndu það og síðan er mjólkurkýrnar (orkulindirnar) seldar upp í skuldina. Þetta er venjubundin aðferð til að ná í verðmæti frá sveitarfélögum eða ríkinu nú í kreppunni, (hugarkreppunni), og áður. Sá sem kaupir lætur fyrirtækið greiða kaupverðið, síðan jarðhita-orkunotendur greiða upphæðina fyrir sig á 5 árum og svo alltaf á 5 ára fresti Við erum ekki á móti einkarekstri, en við viljum halda stjórnunarrétti, ígildi eignarréttar á landinu, vatninu, orkunni, fiskinum, olíunni, það er auðlindunum. Ef til vill er ekki svo vitlaust að þjóðin leysi til sín auðlindir með mínus skatti, á 10 til 15 ára fresti, og endur skoði nýtinguna að bestu manna yfirsýn. Þeir sem væru að nýta réttinn, á hverjum tíma, yrðu að hafa forgang. Við höfum selt jarðvarma orkuna til almennings á kostnaðarverði, af því að við áttum orkulindirnar sjálfir

[Baldvin Jónsson, 28.8.2009 kl. 22:21]

Hallur, oft hef ég verið sammála þér en æði oft einnig ósammála og þetta er augljóslega eitt af þeim skiptum.

Ég er almennt ekki mikill samsæriskenningar smiður eða aðdáandi, en mér þykir núorðið æði einfeldningslegt að trúa engum af þeim ásökunum sem settar hafa verið fram um AGS, efnahagsböðla stórfyrirtækjanna og nú þessa aðkomu MAGMA Energy að málum með miklum þrýstingi frá AGS á ríkisstjórnina.

Ertu nokkuð að festast í loftbólu Hallur?

[Hallur Magnússon, 28.8.2009 kl. 22:53]

Baldvin.

Þú hefur greinilega ekki lesið pistilinn minn.

Það stendur hvert einasta orð sem í honum stendur.

Getur þú bent á eitt atriði sem ekki er sannleikanum samkvæmur?

[Baldvin Jónsson, 29.8.2009 kl. 00:06]

Fyrirgefðu mér Hallur ef ég hef verið of hastur, ég var ekki að gagnrýna hvað þú skrifaðir heldur mikið frekar það sem ekki stendur þarna um samskiptin við Magma Energy.

Hlaup forsprakkans hér um allt að sannfæra mann og annan um að láta ríkið ekki grípa inn í. Þrýstingur AGS í málinu sem að gerði það strax grunsamlegt og svo þær upplýsingar sem fram hafa komið um þennan Ross Beaty benda til þess að þar sé á ferðinni líklegur Economic Hitman.

Ef ekki það þá a.m.k. svona hefðbundinn hákarl sem kaupir, leysir upp í einingar og selur áfram. Ég hef heyrt af því margar sögur undanfarna daga að Rio Tinto bíði hinum megin við hann eftir því að fá að komast að íslenska orku borðinu með beinum hætti.

[Hallur Magnússon, 29.8.2009 kl. 12:28]

Baldvin

Ok.