Bardaginn á Borginni - Hobbiti segir frá!

Bardaginn á Borginni þegar grímklæddir "mótmælendur" sem ekki þora að mótmæla í eigin persónu - enda markmið "mótmælanna" hjá sumum þeirra skemmdarfýsn og  ósk um slagsmál - réðust að starfsmönnum Stöðvar 2 og eyðilögðu sjónvarpsbúnað - verður væntanelga hafður í minnum.

Ég rakst á frábæra frásögn Eyþórs Árnasonar leikstjórar og hins frábæra sviðsstjóra hjá Stöð 2 - á blogginu hans. Frásögn sem á erindi við alþjóð.

Í frásögninni segir meðal annars:

"Það er kannski tilgangslaust að lýsa bardaganum. Hann er að mestu til á myndbandi. En það sem ekki sést vel er hvernig manni leið. Inni í sér. Það er best að taka það fram í byrjun að bardagi er kannski ekki rétta orðið. Hnoð, nudd eða stimpingar eru kannski réttari orð. Og hróp og köll. Sennilega rosalegur hávaði. Svolítið eins og í réttum. Stóðréttum. Og þó, þetta var líkara því að kljást við kálfa. Samt leið manni eins og þetta væri stríð. Þarna vorum við í byrjun fjórir drengir. Fjórir litlir hobbitar og móti okkur streymdi her. Her af svörtu andlitslausu fólki. Andlitslausir Orkar. Og það var svo skrítið að ég sagði ekki neitt. Gat ekki sagt neitt. Hafði ekkert að segja við andlitslaust fólk. Orka. Og við tókumst á..."

Sagan öll er á blogginu hans Eyþórs - og ég hvet ykkur til að lesa hana í heild:

Kryddsíld - Bardaginn á Borginni

Athugasemdir

[Óskar Þorkelsson, 3.1.2009 kl. 12:32]

ertu farinn að kalla pakkið mótmælendur Halli ?

[Ásthildur Cesil Þórðardóttir, 3.1.2009 kl. 12:45]

Engar skemmdir á tækjum Stöðvar 2

Helgi J. Hauksson, ljósmyndari Nei., hafði samband við Stöð 2 til að taka myndir af skemmdum búnaði hjá Stöð 2 en fékk þau svör að búið væri að gera við snúrurnar, aðrar skemmdir hefðu ekki orðið.

Sigmundur Ernir Rúnarsson, fréttamaður, virðist að óathuguðu máli hafa kosið að skrökva til að hækka dramatíska veðið í frásögn af atburðum gamlársdags er hann hélt því fram í útsendingu á staðnum að þar hefði orðið milljónatjón á tækjabúnaði. Daginn eftir dró forstjóri 365 miðla, Ari Edwald, þá dulu yfir orð Sigmundar að segja milljónatjón hafa orðið í auglýsingatekjum og slíku. Kannski í viðskiptavild.

Nýjasta frétt fjölmiðla í eigu 365 miðla af atburðunum er sú að þriggja milljón króna tekjutap hafi orðið af mótmælunum, ekki tjón á tækjum eins og Sigmundur Ernir sagði ósatt um, heldur tekjutap – meðal annars hafi álrisinn Rio Tinto hætt við að styrkja útsendinguna sem féll niður. Væntanlega er hægt að reikna með sömu nákvæmni þær tekjur sem stöðin hefur haft af áhorfi auglýsinga kringum fréttaflutning af mótmælum til þessa, leggja debet við kredit og gera svo upp með vorinu.

Eftirfarandi bloggaði Sigmundur Ernis, 15. desember, um það þegar ritstjóri DV varð uppvís að ósannindum í þágu útgáfufyrirtækisins og eigenda þess:

„Fyrsti kostur er þessi: Reynir Traustason axli sína ábyrgð og segi af sér sem ritstjóri DV. Skaðinn er skeður. Eigendaáhrifin augljós - og þar með dauði dagblaðs … trúverðugleikans. Blað sem hamrar fjölmiðla mest á ábyrgð vakthafandi valdhafa verður að taka mark á sjálfu sér. Pínlegt allt saman í alla staði. Og enn kemur stakan upp í hugann: Það sem varast vildi hann, varð að koma yfir hann! Það er æðsta takmark allra stjórnenda á ritstjórn og fréttastofu að láta eigandann reka sig vegna hagsmunapots og aðgangshörku. Sá sem stendur ekki af sér storminn, fýkur ekki af veðrinu einu saman. En mikil óskaplega sem Þórðargleðin hlýtur að vera hjá þeim sem hafa haldið því fram að eigendur ráði öllu í fjölmiðlum landsmanna. Þeir eiga daginn. Þeirra er sigurinn um stund. Skíturinn af eigendasukki DV dreifist yfir alla aðra miðla. Og það er kannski ágætt. Þeir þurfa þá enn frekar en áður að sanna fyrir lesendum sínum og áhorfendum að þeir stjórnist ekki af eigendum sínum. Það á við um 365. Það á við um Mogga. Og það á líka við um RÚV …

http://blogg.visir.is/mannamal/?p=546

[Sigurður Ingi Jónsson, 3.1.2009 kl. 13:08]

Það er glöggt sjónvarpsaugað hjá Halli. Búinn að greina skemmdarfýsn og slagsmálahvatir hjá fólki sem er ekki lengur í eigin persónu þegar það setur klút fyrir vitin.

Reyndar sá ég líka slagsmálahvatir í sjónvarpi, en þær voru hjá sjálfstæðismanni sem dulbýr sig sem hagfræðing hjá Seðlabankanum.

Pistill Eyþórs er hrein snilld. Hann talar ekki eins illa um þá hettuklæddu og þú, en hann var jú á staðnum.

[Hallur Magnússon, 3.1.2009 kl. 15:50]

Óskar!

Innan gæsalappa

[Magnús Sigurðsson, 3.1.2009 kl. 15:56]

Þú ættir að verða þér út um myndir af þessum atburði sem þú vitnar í Hallur, því upplifun manna er  misjöfn.

[Hallur Magnússon, 3.1.2009 kl. 15:56]

Sigurður Ingi!

Þótt ég hafi ekki verið í hasarnum á Borginni - þá hef ég séð þetta lið í aksjón.

Það ber bara vott um aumingjaskap þegar þessir krakkar fela andlit sín - geta ekki staðið og mótmælt í eigin persónu - einungis í felum!  Það sem verra er að hluti þessara krakka er einungis að leita eftir "fæting" þótt það haldi öðru fram.

Líttu til dæmis á gott blogg Salvarar Gissurardóttur :  Skríllinn mun eiga síðasta orðið http://salvor.blog.is/blog/salvor/entry/760464/

[Hallur Magnússon, 3.1.2009 kl. 15:58]

Pistillinn hennar Salvarar hefst svona:

"Ég varð fyrir miklum hótunum um ofbeldi frá tveimur mótmælendum á gamlársdag, hótunum sem  voru aggressívar og ruddalegar."

Það er nú bara staðreyndin!

[Sævar Finnbogason, 4.1.2009 kl. 13:26]

Nákvæmlega Ásthidur, Sigmundur gerði í brækurnar og augljóst að hann ætti í það minsta að biðjast afsökunnar og hvað á að segja um árásir hans á Egil Helgason