90 ár frá fyrsta skóladegi Samvinnuskólans - nú Háskólans á Bifröst!

Í dag eru 90 ár frá því fyrstu nemendurnir hófu nám við Samvinnuskólann forvera Háskólans á Bifröst. Reyndar er stofndagur Samvinnuskólans talinn 12. ágúst 1918 þegar stjórn Sambands íslenskra samvinnufélaga samþykkti að halda skóla "fyrir samvinnumenn" og að Jónas Jónsson frá Hriflu yrði skólastjóri.

Það var öflugur hópur sem hóf kennslu þennan dag fyrir 90 árum. Jónas frá Hriflu, Ásgeir Ásgeirsson síðar forseti Íslands, Héðinn Valdimarsson, Arnór Sigurjónsson, Guðmundur Magnússon, Jón Guðmundsson og Ólöf Jónsdóttir.

Enda varð Samvinnuskólinn strax öflugur stjórnendaskóli sem skipti íslenskt samfélag verulegu máli.  Þannig hefur það verið alla tíð síðan.

Samvinnuskólinn var fluttur að Bifröst í Norðurárdal sumarið 1955. Þá hófst Bifrastarævintýrið - sem stendur enn!

Í kjölfar breytinga á íslensku samfélagi þar sem menntunarstig þjóðarinnar þróaðist Samvinnuskólinn í Samvinnuháskólann sem nú nefnist Háskólinn á Bifröst.

Hlutverk Háskólans á Bifröst er ekki síður mikilvægt í dag en það var við stofnun Samvinnuskólans árið 1918.  Það er von mín að háskólinn haldi áfram að þróast í takt við samfélagið - eins og skólinn hefur alla tíð gert - og verði áfram með í fararbroddi hér eftir sem hingað til.

 

Hallur Magnússon, formaður Hollvinasamtaka Bifrastar

Athugasemdir

[Hallur Magnússon, 3.12.2008 kl. 11:30]

SÍS merkið var falið undir mottum þegar ég var í Samvinnuháskólanum - en eftir að nafninu var breytt í Viðskitpaháskólann og menn föttuðu að sagan og arfleifðin var stykur - fékk SÍS merkið að skína á ný!

[Guðrún Vestfirðingur (IP-tala skráð) 3.12.2008 kl. 12:21]

Ég ætla rétt að vona að ekki sé kennt í dag í anda samvinnuhreyfingarinnar. Voru þeir ekki nokkrir þaðan sem stóðu að Gift málinu. Ótrúlegt hvernig það fór.