Skjótum sendiboðann öðrum til viðvörunar!

Skjótum sendiboðann sem fletti ofan af forsætisráðherranum með því að birta sjónvarpsupptöku sem ekki var í hans eigu. Eitt er að óska eftir að skila gögnum sem kunna að vera í eigu RÚV, en annað að biðjast afsökunar á því að koma sannleikanum á framfæri við íslensku þjóðina.

Sendiboðanum er hótað lögsókn ef hann verður ekki við tilmælum útvarpsstjóra.  Mun sendiboðinn verða lögsóttur ef hann skilar gögnunum en  biðst ekki afsökunnar?

Sjálfsritskoðun er þekkt í fjölmiðlaheiminum. Það er ástæða þess að almenningur fékk ekki að sjá myndbrotin strax á sínum tíma þótt full ástæða hefði verið til. En þegar sjálfsritskoðun breytist í hreina og klára gamaldags ritskoðun, þá erum við komin út á afar hálann ís. Hvaða mannréttindi verða þá tekin af okkur næst?

Vonandi fellur Páll Magnússon ekki í ritskoðunargryfjuna.

Krafa um að viðtali við Geir verði skilað

Athugasemdir

[G. Valdimar Valdemarsson, 25.11.2008 kl. 12:04]

Páll tekur við tilmælum úr Valhöll það er greinilega skilyrðið sem sett var þegar hann fékk stólinn.

[Halldór Halldórsson, 25.11.2008 kl. 12:26]

Það kemur ekki beinlínis á óvart að sumir telja fólk í blaða- og fréttamannastétt til hálfguða; þar sem þetta hyski hefur, upp til hópa, beinlínis haft uppi áróður í þá veru um áratugaskeið.  Mér kemur bara á óvart að sæmilega hugsandi fólk skuli vilja vera rasssleikjur þeirrra.  Og svo er náttúrlega hugsanlegt að sumir sitji með "leyndarmál" frá fyrra opinberu starfi og bíði eftir nógu góðu "tilboði".  Skyldu t.d. einhver framsóknarleyndarmál vera í fórum fyrrum bitlinga flokksins úr kerfinu??

[Friðrik Þór Guðmundsson, 25.11.2008 kl. 13:27]

G. Pétur fór á svig við siðareglur, en undir ríkjandi kringumstæðum hygg ég að borgaraleg óhlýðni hans sé fullkomlega verjandi og kalli ekki á neina afsökunarbeiðni til RÚV, því ég hygg að eigandi RÚV sé sáttur.

[Sigurður Hrellir, 25.11.2008 kl. 14:29]

Svona þjónkun fjölmiðla við yfirvöld má ekki líðast. Sendum kvörtun, sjá hér.

[Sigurður Geirsson (IP-tala skráð) 25.11.2008 kl. 15:20]

Best að ég komi með annað viðhorf hér en þeir sem þegar hafa tjáð sig, enda virðist múgsefjun vera tíska dagsins, þar sem hver apar upp eftir öðrum.

 Varðandi þetta myndbrot sem ég hef ekki nennt að skoða nema hluta af hef ég það eitt að segja að ég skil ekkert í því að stjórnmálamenn, alveg sama í hvaða flokki eru, séu ekki löngu búnir að stökkva upp á nef sér og láta nokkur vel valin orð falla í garð fréttamanna. Þvílík og önnur eins vinnubrögð sem þeir stunda og vankunnátta þeirra á því sem þeir eru að fjalla um. Þeir gaspra um allt milli himins og jarðar eins og þeir séu þeir einu sem eitthvert vit hafa á hlutunum, spyrja Jón og Gunnu um allt mögulegt og útvarpa þessari vitleysu svo yfir okkur í tíma og ótíma. Þeir eru ófáir fréttatímarnir og umræðuþættirnir sem maður hefur horft á í sjónvarpi og hlustað á í útvarpi þar sem maður dauðskammast sín fyrir fréttamanninn eða þáttastjórnandann, og í mörgum tilfellum hefur maður bara ekkert skilið í jafnaðargeði viðmælanda fréttamannsins að láta þessa víðáttuvitleysu ganga yfir sig.

Á móti er maður síðan hífandi reiður í garð fréttamanna sem láta stjórnmálamenn komast upp með það að svara einföldum spurningum með því að gaspra og góla og láta gamminn geysa út um víðan völl, án þess þó að segja nokkuð í þá átt að svara spurningunni. Viðkomandi fréttamaður hefur síðan kokgleypt þennan moðreyk þar sem hann var bara ekki betur af guði gerður og vantaði greinilega þó nokkurn slatta af gráum sellum til að skilja að verið væri að hafa sig að fífli.

Varðandi þetta atirði eitt og sér þá hefur hann G. Pétur ekki gert neitt annað en það sem fyrrum forstjóri Orkuveitunnar gerði þegar hann hætti störfum, en þá mun hann hafa tekið einhver gögn með sér sem hann sagðist hafa tekið þar sem hann gæti þurft á þeim að halda síðar, en voru eign Orkuveitunnar. Í því tilfellinu var honum hótað kærum ef hann skilaði ekki þeim gögnum sem hann ekki átti. Ég get ekki séð að neitt annað eigi við um G. Pétur. Við skulum svo hafa í huga að með þessu hefur hann gerst sekur um brot í opinberu starfi, eða viljum við opna fyrir það að öllum opinberum starfsmönnum sé heimilt að taka hvað eina sem þeim þóknast af eigum hins opinbera og nota síðan á þann hátt sem þeim hentar sjálfum? Ég bara spyr.

[Sigurður Hrellir, 25.11.2008 kl. 16:10]

Sigurður, það er ekki víst að þú hafir rétt fyrir þér. Höfundaréttur myndefnis er mjög öflugur og í þessu tilfelli eiga fréttamaðurinn og tökumaðurinn vafalaust efnið þó svo að fréttastofan nýti það.

[Nína S (IP-tala skráð) 25.11.2008 kl. 23:56]

Fyrirgefðu Hallur minn þegar ég bað þig að opna augun, ég var í mjög þungu skapi eftir að hafa horft á borgarafundinn í gær. OK, þú ert með augun opin.Hins vegar ætla ég að svara Sigurði Geirssyni hér að ofan í sambandi við fréttamyndbandið og vísa í komment sem ég skrifaði hjá Stefáni. Þar tala ég um niðurlægingu.            Hvernig líður niðurlægðum manni? Hvernig getur hann rétt sinn hlut? Fréttamaðurinn var hunsaður og niðurlægður, reyndi að ná reisn að nýju, en var ýtt í burtu. Hvað gerði yfirmaðurinn? Sagði honum að klippa þetta frá. Í stað þess að standa með honum. Þá átti bara að stinga þessu undir stól. Niðurlægingin verður að gremju. Að mæta ekki skilningi undirstrikar að niðurlægingin hafi verið réttmæt. Myndbandið sýnir einmitt þessa niðurlægingu, burtséð frá því hvort Geir hafi verið í vondu skapi eða ekki. Og það sem meira er, þá tel ég myndbandið táknrænt fyrir það sem fólk hefur orðið fyrir frá því ríkið yfirtók Glitni, þ.e. það er ekki talað við okkur þjóðina, engar fréttir, ekkert. Það er niðurlæging. Sem vekur gremju. Og síðan reiði. Réttláta reiði. Myndbandið er því táknrænt fyrir ástandið í dag. Krafa fólks hefur verið: Talið við okkur, segið okkur hvað þið eruð að gera. Svo einfalt er það.

[Hallur Magnússon, 26.11.2008 kl. 00:45]

Ekkert mál Nína!

... og endilega haltu áfram að veita mér aðhald hér á blogginu!

[Friðrik Þór Guðmundsson, 26.11.2008 kl. 12:18]

Hvar og hvenær bað Nína Hall að opna augun? Hér á blogginu eða... voru þau sofandi saman einhvers staðar og Nína vildi vekja Hall?

[Hallur Magnússon, 26.11.2008 kl. 22:23]

Gott ef það hefði ekki verið á blogginu!

En það var á blogginu. Nína las ekki allan pistilinn - eða mislas einhverja setninguna - og hvatti mig til að opna augun!  En eftir athugasemd frá mér - þá las hún pistilinn aftur - og sá að - aldreið þessu vant - hafði ég verið með augun galopin!

[Nína S (IP-tala skráð) 27.11.2008 kl. 21:28]

Já, Friðrik minn, það hefði nú ekki verið amalegt að við Hallur hefðum verið sofandi saman, það er afar líklegt að slíkt gerist ef við myndum hittast, sitjandi í sitt hvorum sófanum með 3 ltr. af kaffi eða te, ræðandi málin og þrasandi þar til við lognuðumst út af. Og um morguninn myndi ég segja; Hallur! opnaðu augun, maður. Og hann myndi segja; Já, en ég hef haft þau galopin smástund. Og svo: Hvort okkar á að hella uppá kaffi? Höldum svo áfram að kjafta saman. Jamm og jæja. Þetta var nú svona útúrdúr. Hafðu það gott.