Skerum útlendinga á Suðurnesjum!

Í stað þess að loka skurðstofum Heilbrigðisstofnunar Suðurnesja þá átti stjórn stofnunarinnar að snúa vörn í sókn og tryggja sér sértekjur til að standa undir rekstri langt umfram kostnað vegna skurðstofanna með því að fá okkar færu bæklunarlækna til þess að skera útlendinga fyrir dýrmætan gjaldeyri!

Ég er viss um að fjöldi erlendra sjúklinga  - sem eiga rétt á að gangast undir aðgerðir hvar sem er á evrópska efnahagssvæðinu þegar þeir hafa verið ákveðinn tíma á biðlista í heimalandi - vildu mjög gjarnan koma hingað í aðgerð hjá færum skurðlæknum við bestu aðstæður!

Staða krónunnar er þannig að slíkar aðgerðir eru tiltölulega ódýrar fyrir útlendinga - en gæfu okkur Íslendingum góðar tekjur í krónum. Viss um að heilbrigðisyfirvöld í Evrópu væru til í að nýta sér hágæðaþjónustu á tombóluprís til að leysa erfiða biðlista - og einstakæingar með sæmileg fjárráð væru einnig reiðubúnir til að greiða fyrir slíkar aðgerðir sjálfir.

Heilbrigðisstofnun Suðurnesja er sérstaklega hentug vegna nærveru við alþjóðaflugvöll! Þá væru unnt að breyta einhverju af blokkunum á Keflavíkurflugvelli í sjúkrahótel vegna þessa! (Þarna missti ég út úr mér góðri viðskiptahugmyn).

Á milli þess sem við skærum útlendinga - þá væri samhliða unnt að klára biðlista vegna íslenskra aðgerða.

 

HSS segir upp fólki

Athugasemdir

[Heidi Strand, 21.11.2008 kl. 21:09]

Upplagt að fá norðmenn. Það eru svo langir biðlistar á norskum sjúkrahúsum.
Kannski geta íslendingar læknað upp í skuld.

[Óskar Þorkelsson, 21.11.2008 kl. 21:30]

jupp.. skerum upp í skuld :)

[Ásgeir Kristinn Lárusson, 21.11.2008 kl. 21:35]

Skyldi Róbert Wessmann hafa fengið sömu hugmynd, er hann heimsótti HHS?

[Theódór Norðkvist, 21.11.2008 kl. 22:07]

Fyrst allt stefnir í að takmark frjálshyggjumanna um að gera Ísland að útsölubás Evrópu númer eitt á vinnuafli og auðlindum (sjá hér) muni nást er þetta ágætis hugmynd til að hala inn tekjur.

[Nína S (IP-tala skráð) 21.11.2008 kl. 22:30]

Hallur, þú gleymir þeim Íslendingum sem fara í aðgerðir erlendis, t.d. á Norðurlöndum. Þú gleymir að bæklunarskurðlæknar eru ekki á hverju strái, Það er varla að þeir komist yfir landa okkar sem þurfa á því að halda. Einn bæklunarlækni veit ég um sem starfar bæði í Svíþjóð og á Íslandi og skiptir sér á milli. Hvar ætlarðu að fá bæklunarskurðlækna til að skera í útlendingana? Það yrðu þá að vera útlenskir skurðlæknar. Eru þeir jafnfærir og þeir íslensku fyrir lítinn pening, þ.e. miðað við það semþeir fá t.d. í Bandaríkjunum? Ég bara spyr.

[Hallur Magnússon, 21.11.2008 kl. 23:02]

Nína.

Það er ekki skortur á bæklunarlæknum sem eru í veginum fyrir því að vinna hraðar á biðlistum. Ástæðan er fjárskortur. Ef þú bara vissir hvað við eigum marga færa bæklunarskurðlækna!

[JR (IP-tala skráð) 21.11.2008 kl. 23:24]

Hallur !

 Þú segir að fjárskortur sé ástæðan !

Er það ekki frekar forgangsröð verkefna hjá hinu opinbera ?

Eftirlaunaréttur æðstu embættismanna og allt þetta gerspillta embættismannakerfi er svo dýrt !

Hvernig væri að þið, sem eruð skrifandi og talandi , og eruð á kafi í pólitík kæmuð með tillögur um niðurskurð í eigin gerspillta embættismannakerfi ?

Það hljómar orðið svo falkst þegar þið skrifið eða talið , vandamálið er forgangsröðun hjá pólitíkusum !

[Friðrik Hansen Guðmundsson, 21.11.2008 kl. 23:31]

Hjartanlega sammála þér Hallur.

Þetta er þjónusta sem við eigu að bjóða upp á. Í þessu tilfelli er það ríkið sem hefur öll spilin á sinni hendi. Hingað til hefur því miður ekki verið vilji fyrir slíku frumkvæði þar þar á bæ.

Ég benti á þennan möguleika í grein 1994 sem er jafn góð í dag og nú. Þar var ég reyndar að horfa á hjartaskurðlækningar. Sjá:

http://www.simnet.is/fhg/index_files/Page3166.htm

Hvort um er að ræða bæklunar- eða hjartalækningar eða hvað annað innan heilbrigðisgeirans þá er spurningin bara að við hittum á okkar "hillu" og seljum þjónustu á því sviði og öflum gjaldeyris. Við höfum hér allt í hendi til að gera þetta. Að afla gjaldeyris á að vera okkar aðal markmið næstu árin.

[Hallur Magnússon, 22.11.2008 kl. 00:03]

JR.

Ekki að ég sé að verja eftirlaunakjör þingmanna og ráðhera - en hvað finnst þér eðlileg eftirlaun fyrir 20 ára þingsetu og 8 ára ráðherradóm?

Friðrik!

Ég vann einmitt árið 1994 á áætlana og hagdeild Ríkisspítala við að setja upp kostnaðargreiningar- og frávikslíkan fyrri handlækningasvið.

Þar skoðaði ég meðal annars hjartaskurðlækningarnar - með sérstkal áherslu á hagkvæmni þess að gera ákveðnar hjartaskurðlækningar á börnum hér heima.

Við það sannfærðist ég um að við gætum "flutt út" hjartaskurðlækningarnar með því að flytja inn sjúklinga frá útlöndum. Við eigum að sjálfsögðu að nota þær fjárfestingar og fastakostnað sem felst í vel útbúnnum skurðdeildum okkar - og nýta frábært starfslið til að vinna ekki einungis við að skurðaðgerðum fyrir Íslendinga - heldur einnig að taka að okkur verkefni frá útlöndum - ef slík verkefni eru til staðar. Viðbótin er fyrst og fremst breytilegur kostnaður - ekki fastur - og tryggir betri nýtingu þess fjármagns sem við höfum notað í dýrmætar fjárfestingar í öflugu - en dálítið dýru heilbrigðiskerfi okkar.

Að sjálfsögðu eigum við að nota veika stöðu krónunar til að veita hágæðameðferð sem kostar sitt í íslenskum krónum - en er tiltölulega ódýr meðferð fyrir útlendinga sem greiða í erlendri myndt.

Treysti Gulla heilbrigðisráðherra til þess að skapa grundvöll fyrir svona starfsemi á Suðurnesjum.

En það á að vera ríkið en ekki einhverjir auðmenn sem eiga að hagnast á slíku - en það var einmitt það sem hinn nýi öflugi þingmaður Helga Sigrún var að undirstrika með fyrirsprun sinni til heilbrigðisráðherra í þinginu í dag.

[Hörður (IP-tala skráð) 22.11.2008 kl. 00:35]

 Hallur minn eg verð að segja það að mer bra dalitið við fyrirsögnina. Konan min er nefnilega utlendingur og við buum a suðurnesjum.

[Ólafur Ingimarsson (IP-tala skráð) 22.11.2008 kl. 00:57]

Sæll Hallur. Þessi hugmynd er auðvitað ekki ný og hefur verið skoðuð. Sjúkrahúsið á Akureyri hefur t.d. boðið í að gera bæklunaraðgerðir fyrir Norðmenn og nokkrir Grænlendingar hafa komið þangað til aðgerðar. Vandamálið hefur ekki verið skortur á læknum eða aðstöðu heldur fyrst og fremst kostnaður við að koma fólki hingað á staðinn og út aftur. Það hefur skekkt samkeppnisstöðuna við sjúkrahús á hinum Norðurlöndunum en kannski gengisfallið hafi breytt einhverju þar um. Annar þáttur sem vinnur á móti er að það er ekki ákjósanlegt að ferðast langt stuttu eftir stórar aðgerðir vegna hættu á fylgikvillum. Það er hins vegar rétt að með nýju skurðstofunum gæti HSS hæglega orðið mjög hagkvæm og skilvirk eining fyrir svona starfsemi og t.d. hægt að eyða biðlistum hér á stuttum tíma ef vilji stæði til þess. Það sem þarf er fjármagn vilji og gott skipulag.

[Gunn (IP-tala skráð) 22.11.2008 kl. 06:11]

Hið íslenska heilbrigðiskerfi verður æ undarlegra sem maður sér þetta í fjarlægð.  Það eru að verða 20 ár síðan ég vann á í íslenska heilbrigðskerfinu síðan hef ég unnið erlendis.

Það búa einungis 300.000 manns á Íslandi, þetta er eins og einn lítill bæjarhluti í stórri borg. Í stað þess að hafa eitt öflugt sjúkrahús og 1 -2 stórar einkaklínikkur er þessu smurt út um allt í litlar einingar.

Þegar maður erlendis spyr um árangur aðgerða verður fátt um svör frá Íslandi það er engin skráning í mörgum tilfellum á fylgikvillum eins ekki einu sinni á árangri krabbameinsaðgerða. Og þegar spurt er um fjölda aðgerða verða menn ennþá héralegri enda eru þetta oftast bæði fáar og litlar aðgerðir sem eru gerðar á flestum af þessum stöðum. Stórar aðgerðir eru dýrar, þú þarft dýran búnað og dýran lager og ekki minnst þú þarft að hafa til þess að gera margar aðgerðir til að halda skurðlækninum og skurðteyminu í æfingu.  Mikið af þessum aðgerðum á litu stöðunum eru inngrónar táneglur, skakkar tær, æðaslit, fæðingarblettir og hnéspeglanir, þetta eru aðgerðir sem fólk ferðast ekki á milli landa til að fá.  Dýru aðgerðirnar eru þær sem þú þarft að hafa gjörgæslu og þar erum við í mjög slæmum málum enda eru þetta dýrustu sjúklingarnir þegar illa fer.  Gjörgæsludeildarrúm á Íslandi eru afar fá og þessar deildir eru yfirfullar þegar af Íslendingum eftir slys og annað. 

Þegar kemur að heilbrigðiskerfi þarf að velja á milli gæða þjónustunnar og dreyfbýlissjónarmiða og vegna þess hversu þjóðin er fámenn er erfitt að fella þetta saman.

Við verðum fyrst og fremst metin út frá gæðum þjónustunnar og árangri.  Það að hafa lausa skurðstofu og nokkra hjúkrunarfræðinga er ekki nægilegt eitt og sér.  

[Gunn (IP-tala skráð) 23.11.2008 kl. 09:16]

það tekur 30-45 mín að keyra í sjúkrabíl á Landspítalann frá Keflavík. Það er ekki "stand by "skurðlæknir, svæfingalæknir eða skurðteymi í Keflavík eða á Selfossi það þarf að kalla það út og það tekur minnst 30 mín væntanlega 1 tíma ef það er þá hægt.

Væntanlega er hægt að bæta kerfið með að bæta viðbragðsgetu, búnað og tækjakost sjúklingaflutninga og samþjappa heilbrigðiskerfinu í þessu fámenna landi þá gætu stórar upphæðir sparast og ef við myndum nota það til að auka gæði heilbrigðisþjónustunnar gætum við fengið bætt heilbrigðiskerfi fyrir minni tilkostnað.  Að hafa fólk á næturvöktum með 1 eða engan sjúkling er bæði dýrt og slæmt.  Þetta er þá atvinnubótarvinna og ef hún verður á kostnað gæða heilbrigðisþjónustunnar er þetta geysilega alvarlegt mál.  Þar stangast byggðasjónarmið við heilbrigðissjónarmið. Stórhöfuðborgarsvæðið með Selfoss, Keflavík, Grindavík, Akranesi og Borgarnesi væri hægt að líta á sem eitt svæði.

Það er beint og mælanlegt hlutfall milli fjölda skurðaðgerða og mælanlegum árangri fjölda dæma í krabbameinsaðgerðum, bæklunaraðgerðum etc.  Smáu sjúkrahúsin sem gera lítið af aðgerðum hafa upp til hópa hrapalegan árangur.  Fleirri alþóðlegar rannsóknir sýna þetta.  Til dæmis eru miklar efasemdir um að sjúkrahús sem hafi minna en 500 fæðingar á ári eru í nægilega góðri þjálfun, það er alla vega niðurstaðan í Noregi þar sem það er sett sem lágmark og þar er fyrst og fremst horft á faglega en ekki fjárhagslega þáttinn.

Vandamálið er að Sjúkrahúsið í Keflavík er ekki lífsnauðsynlegt, frekar en Selfoss, St. Jósefs, og Akranes þegar betur er á horft.  Fáar, dýrar og smáar einingar.  Þetta verður sársaukafullt ef það á að smyrja sparnaðinum yfir allt þá verður þetta ennþá dýrara og þjónustan skerðist umtalsvert.  Hvað á að vega sterkara á þessum sparnaðartímum atvinnu- og byggðasjónamið eða gæða- og læknisfræðilegt sjónarmið. Þessi óþægilega umræða verður stöðugt meira aðkallandi þegar við erum komin í þrengingartíma.  Hvað vill fólk dýra og dreifða þónustu eða ódýrari og stærri þjónustu sem faglega séð gæti orðið betri. 

[Agnes (IP-tala skráð) 24.11.2008 kl. 07:12]

Sæll GUNN, 

Það tekur 30-45 mín að keyra sjúkrabíl á Landspítlann frá Keflavík, það er rétt en það tekur um 10 mín að kalla saman starfsfólk skurðstofu (sem búsett er á svæðinu). Þar sem þú ritar eins og sá sem þekkingu hefur af starfseminni þá ættir þú að vita að það er margt sem þarf að undirbúa og gera áður en til svæfingar/deyfingar kemur. Á Landspítalanum eru nú ekki alltaf allir sem á vaktinni eru í húsinu og ekki er gerð krafa um búsetu tengt viðbragðstíma.

Eflaust má endalaust hagræða í rekstri en að lokum kemur að því að lengra er ekki hægt að ná. Á litlum einingum líkt og á kragasjúkrahúsunum hefur í gegnum tíðina endalaust verið hamrað á sparnaði og ekkert nema sparnaði. Ég læt mig stórlega efast, já ég veit að svo langt í sparnaði hefur Landspítalinn aldrei náð og á sama tíma gæta hagsmuni almennings og almannafé.

Á Landspítalanum er allt til alls en samt ekki nóg. Enginn dregur í efa þau faglegu markmið sem þar er unnið eftir en gegnum streymið er mikið og verkefnin endalaus og nú á að fjölga þeim. Á að fjölg þeim sem vinna verkin? Kvennadeild LSH hefur í gegnum tíðina fengið að taka á því þegar sumarlokanir hafa gegnið yfir (Selfoss og Keflavík) og þá hefur heldur betur þótt erfitt að bæta við aðgerðum og legudögum. Ekki nægjanlegt aðgerðarpláss né legupláss. Nú blasir við með lokun skurðstofu HSS að fæðingardeildin mun leggjast og er þá pláss á LSH til að taka á móti öllum þeim verðandi mæðrum sem af Suðurnesjum koma?

Ég hef aldrei verið þeirrar skoðunnar að mannslífið væri eitthvað ódýrt eða á nokkurn hátt hægt að setja á tilboðsprís. Suðurnesjafólki hefur þó verið boðin heilbrigðisþjónusta á algjöru tilboði. Samkvæmt úthlutunum ráðuneytisins er lang lægsta upphæð á hvern íbúa einmitt hér á Suðurnesjum. Það munar nokkrum tugum milli HSS og næstu stofunnar. Hvernig má þetta vera? Hvernig stendur á því að ráðuneytið samþ. að byggja nýjar skurðstofur með öllum þeim tilkostnaði sem af því hlaust? Hvernig stendur á því að ekki mátti fullnýta þær skurðstofur heldur einungis nota hluta? Skyldi það vera tilviljun að ýmsir fjárfestar séu nú bendlaðir við að vera að koma og taka út húsnæðið með einkavæðingu í huga? Heyrst hefur að verið sé að íhuga að gera spennandi aðgerðir á útlendingum já jafnvel bara magaminnkunaraðgerðir. Fólk sem er offeitt er nú ekki auðveldasta fólkið til að taka í aðgerðir og hvað þá sinna eftir á. Ef þetta reynist satt þá verður enginn sparnaður né hagræðing því það er bara verið að taka úr næsta vasa. Einkavæðing eður ei það er og verður alltaf íslenskur almenningur sem þarf að borga brúsann.

Þú spyrð hvað fólk vill, það er augljóst. Fólk vill fá góða og persónulega þjónustu. Þetta er ekki eins og að fara á Burgerking og fá stækkun á máltið. Ódýr og stærri þjónusta er ekki alltaf svarið.