Skapaði Seðlabankinn lausafjárkrísu Glitnis til að geta þjóðnýtt bankann?

Ef það er rétt að Seðlabanki Íslands hafi skapað lausafjárkrísu Glitnis með því að taka 300 milljóna evra lán hjá sama aðila og gjaldfelldi lán Glitnis upp á 150 milljónir evrur í kjölfarið, þá get ég ekki séð annað en að um hreina og klára aðför seðlabankastjóra að Glitni hafi verið að ræða!

Það er deginum ljósara að Seðlabankinn gat lánað Glitni fé til að Glitnir kæmist út úr þeirri lausafjárkrísu sem Seðlabankinn virðist hafa skapað! En af einhverjum ástæðum - sem greinilega virðast ekki málefnalegar - kaus Seðlabankinn þess í stað að þjóðnýta Glitni nánast með misneytingu!

Duglaus forsætisráðherra spilaði að sjálfsögðu með!

Það sem gerir málið enn alvarlega er það að íslenski Seðlabankinn gerði ekkert til þess að vera með í samkomulagi norrænu seðlabankanna og seðlabanka Bandaríkjanna um aðgang seðlabankanna að dollurum sem hefði gert 300 milljóna evra lánið sem felldi Glitni óþarft!

Höfum við efni á því að hafa svona seðlabankastjóra og svona forsætisráðherra? 

Í frétt mbl.is segir m.a.:

"Ein þeirra skýringa sem nefndar hafa verið, samkvæmt heimildum blaðsins, er sú að Seðlabankinn hafi fengið lán upp á 300 milljónir evra hjá sama banka. Og var því beint til Glitnis, samkvæmt sömu heimildum, að sækjast eftir láni frá Seðlabankanum.

Þá kemur fram að forsvarsmenn Glitnis hafi ekki talið sig geta sótt evrurnar á markað án þess að veikja krónuna verulega."

Ef þetta er satt þá hefur Jón Ásgeir rétt fyrir sér þegar hann segir: „Stærsta bankarán Íslandssögunnar“.

Ef þetta er rétt - sem ég trúi varla - þá kann þetta að vera löglegt - en þetta er algerlega siðlaust!

VIÐBÓT

Eftir að hafa lesið leiðara Þorsteins Pálssonar ákvað ég að bæta orðum hans við þessa færslu mína kl. 10:15:

"Stjórnarþingmennirnir Bjarni Benediktsson og Illugi Gunnarsson settu fyrr á þessu ári fram sjónarmið um mikilvægi þess að Seðlabankinn gerði ráðstafanir til að auðvelda bönkunum að veita eðlilegu súrefni inn í atvinnulífið. Gagnrýni bæði atvinnulífsins og samtaka launafólks hefur beinst að þessu sama á undanförnum mánuðum. Bankastjórn Seðlabankans hefur talið þessa gagnrýni léttvæga.

Í gær kom fram af hálfu bankastjórnarinnar að hún hefði fyllsta traust á stjórnendum Glitnis, eiginfjárstaða hans væri afar sterk og allt útlit væri fyrir að ríkissjóður geti selt hlut sinn með góðum hagnaði á næstu misserum. Þessar yfirlýsingar benda til þess að slæmur rekstur hafi ekki verið orsök þess að bankinn komst í hann krappan heldur tímabundnir erfiðleikar við fjármögnun.

Í þessu ljósi er eðlilegt að spurt sé hvers vegna ekki var talið rétt að Seðlabankinn kæmi fram sem lánveitandi til þrautavara við þessar aðstæður. Miðað við sveigjanleg viðbrögð erlendra seðlabankan við aðstæður líkum þessum er þörf á að skýra þessa atburði betur og þá grundvallarstefnu sem að baki býr. Verður sömu ráðum fylgt ef frekari aðstoðar verður þörf á fjármálamarkaði?"

Erfiðir gjalddagar framundan

Athugasemdir

[Ragnar Freyr Ingvarsson, 30.9.2008 kl. 08:13]

Sæll Hallur

Af hverju ætti ríkið að lána svona mikla fjárhæð án þess að fá eitthvað fyrir sinn snúð?

Svo má líka snúa orðum Jón Ásgeir á hann sjálfann - á Íslandi hafa bankar"rænt" öllu því sem hægt var að taka. Vextir eins háir og hugsast getur, verðbólga verður yfir 20 prósent, gengi krónunnar fallið um 50 prósent frá áramótum. Ekki gerðist þetta af sjálfu sér án aðkomu bankanna?

[Hallur Magnússon, 30.9.2008 kl. 08:15]

Ég geri nú ráð fyrir að Glitnir hefði greitt eðlilega vexti af láninu! Auk þess hefði verið einfalt að taka veð í hlutabréfum bankans í stað þess að þjóðnýta hann strax! Þetta lyktar ekki vel...

[Magnús Orri Einarsson (IP-tala skráð) 30.9.2008 kl. 08:22]

Rétt hjá þér Hallur, eins og oft áður. Ég var að spyrja mig þessarar spurningar í gær (í hljóði) og fékk enginn svör. Það er margt loðið við þetta mál og nú stendur það upp á blaðamenn að standa vaktina og spyrja allra spurninga, erfiðra jafnt sem hinna, um þessi mál og hætta ekki fyrr en trúverðug svör fást.

[Hallur Magnússon, 30.9.2008 kl. 08:27]

Ragnar!

"... Vextir eins háir og hugsast getur, verðbólga verður yfir 20 prósent, gengi krónunnar fallið um 50 prósent frá áramótum. Ekki gerðist þetta af sjálfu sér án aðkomu bankanna?"

Þetta er að stórum hluta vegna rangrar aðgerða og hávaxtastefnu Seðlabankans,  síðustu fjárlögum ríkisstjórnarinnar og algeru aðgerðarleysi ríkisstórnarinnar í kjölfarið.

[Landfari, 30.9.2008 kl. 08:30]

Það þarf nú enginn að segja mér að Glitnit hafi ekki tekið erlent lán til að verja stöðu krónunnar. Þeir hefðu örugglega tekið það ef þeir hefðu getað það.

Það er meira en lítið langsótt að kenna seðlabankanum um að Glitnir hafi ekki fengið lán erlendis.

Hitt er annað að það þarf góðar skýringar á hvers vegna Seðlabankinn lánaði ekki þessa upphæð í staðinn fyrir að taka yfir bankann.

Eigið fé bankans var um 200 milljarðar og eftir þessa innspýtingu ætti það því að vara um 285 milljarða. Af því kenur ríkið með 85 milljarða sem er innan við þriðjungur en ríkið eignast 75% í bankanum.

Þetta eru reyfarakaup finnst mér.

[Jón Ingi (IP-tala skráð) 30.9.2008 kl. 08:46]

það skal enginn hér reyna að segja manni það að eigið fé glitnis verði 285 milljarðar eftir næsta uppgjör, málið er það að nú eru stórir gjaldagar á lánum þeirra ásamt því að framlög á afskriftareikning félagsins mun hækka um mörg hundruð prósent. eigið fé bankans mun því að öllum líkindum verða mjög lítið eftir uppgjör þriðja ársfjórðungs.

og það er eðlilegt að jón ásgeir væli, hann er gjaldþrota - stoðir áttu allt sitt í glitni sem að hefur orðið að engu og baugur hefur nýlega lagt 65 milljarða í félagið stoðir.

samantektin er því sú að Stoðir eru gjaldþrota, baugur er nánast gjaldþrota og ég held að þetta sé bara byrjunin á dómíno hruni á íslandi. því er alveg spurning hvort að lán hefði ekki veirð betra en yfirtaka því að eignarsafn stærstu eiganda Glitnis verður verðlaust og eigið fé þeirra því verðlaust að sama skapi.

[Landfari, 30.9.2008 kl. 09:11]

Fyrir viku var eigið fé Glitnis metið 200 milljarðar í samningaviðræðum við Byr. Ef það hefur lækkað um á annað hundrað milljarða ber bankanum að gefa út afkomuviðvörun hefði ég haldið. Það hafa ekki verið gefnar neinar skýringar á hvert allt þetta fé hefur farið.

[corvus corax, 30.9.2008 kl. 09:42]

Það er frábært að ríkið skuli eignast banka aftur með "reyfarakaupum". Ríkið gaf nefnilega nokkra banka og ríkisfyrirtæki hérna um árið og það voru engin "reyfarakaup" fyrir ríkið sem er jú bara við almennningur og skattgreiðendur í landinu. Af hverju má ríkið ekki gera reyfarakaup þegar hluthafar Glitnis hafa stundað reyfarakaupaviðskipti af einkahagsmunum gegnum tíðina. Eru ekki Jón Ásgeir og Hannes Smárason búnir að kaupa og selja hvor öðrum flugfélagið Sterling a.m.k. fjórum eða fimm sinnum til að ljúga upp verðið og ná síðan "reyfarasölu"? Það þarf ekki að vorkenna hluthöfum Glitnis frekar en öðrum sem eru nú að tapa hlutfjáreign á pappírnum sem þeir hafa fengið með ofsagróða við hækkun hlutabréfa undanfarin ár. Hlutabréfaviðskipti hafa bæði í för með sér tap og gróða og þetta ættu þátttakendur að vita manna best. Vogun vinnur, vogun tapar, svo einfalt er það.

[Jón Valur Jensson, 30.9.2008 kl. 09:48]

Stór orð, Hallur minn.

[Jóhannes Snævar Haraldsson, 30.9.2008 kl. 11:12]

Það er náttúrulega fáránlega langsótt að Seðlabankinn hafi komið í veg fyrir lán til Glitnis, en algjörlega óskiljanlegt af hverju þeir veittu Glitni ekki þrautarlán. Á því er í raun bara ein nothæf skýring, og það er hefndar samsæris kenningin.

Í alvöru talað. Veltum fyrir okkur hvaða skilaboð Seðlabankinn er í raun að senda út í viðskiptalíf heimsins. Þá er ég ekki að meina hvað við íslenskur almúgi sem eigum bara skuldir hugsum.

 Á mánudag í síðustu viku var Glitnir algjörlega glansandi fyrirtæki. Geir Haarde sagði eftir fall Leman B að það hefði engin áhrif á Íslandi, plús svo allt hitt sem hann hefur látið út úr sér um góða stöðu fjármálakerfisins á Íslandi. ALLIR íslensku bankarnir væru í topp lagi. Stofnun sem heitir Fjármálaeftirlitið. FME, hefur gert álagspróf á öllum íslensku bönkunum og þeir standast það allir með glans. Glitnir með 12% eiginfjárhlutfall og hagnað upp á miljarða á hverjum ársfjórðungi.

Nokkrum dögum seinna grípur Seðlabankinn til aðgerða sem segja að Glitnir hafi verið GJALDÞROTA. (og einn Seðlabankastjórinn segir það beint út)

M.ö.o mat FME er ekki skeinispappírs virði . Það er ekki orð að marka íslensk stjórnvöld.

Og ég sem hélt að ég væri svartsýnismaðurinn sem hefði ekkert álit á FME eða yfirlýsingum íslenskra stjórnvalda, en slíkar yfirlýsingar, sem þessi gjörningur felur í sér, hefði ég aldrei látið flakka

[Guðmundur Andri Skúlason, 30.9.2008 kl. 11:21]

Lánalínur voru skyndilega afturkallaðar og því fór sem fór. Það var bara eitt í stöðunni að gera því það getur ekki nokkrum manni verið alvara með að íslenska ríkið hefði átt að lána einum aðila rúmlega 6% af landsframleiðslu?

[Helgi Hrafn Gunnarsson (IP-tala skráð) 30.9.2008 kl. 11:24]

Ég veit ekki... ég er sjálfur afskaplega hlynntur bankaránum þannig að ég ætla ekki að rengja þig. ;)

[Haukur Nikulásson, 30.9.2008 kl. 11:49]

Hallur er svolítið að hræra því upp sem mér hefur dotið í hug. Sami erlendi lánveitandi á í hlut hjá Seðlabankanum og Glitni. Davíð er alveg trúandi til þess að láta þessa stofnun loka á Glitni ef hann kærir sig um það. 

Það hefur lengi blundað í besta vini Davíðs, Kjartani Gunnarssyni (fyrrverandi framkvæmdastjóra Sjálfstæðisflokksins og stjórnarmanni Landsbankans) og Björgólfsfeðgum að vilja eignast Glitni líka. Þetta er brunaútsalan sem Björgólfur beið eftir.

Ég vil ekki útiloka að þeir hafi séð þennan möguleika í stöðunni og gengið í það með látum. Mér finnst hlutur Lárusar Welding í atburðarásinni í meira lagi dularfullur, maður fær á tilfinninguna að hann hafi stýrt málum sem málaliði Landsbankans. Undir eðlilegum kringumstæðum fengi hann að fjúka, en í staðinn er honum hælt og látinn sitja áfram þrátt fyrir gjaldþrot???!!!

Ríkisstjórnin átti engan þátt í þessu, það hljóta allir að sjá. Geir er kallaður frá útlöndum til að klára málið hjá Davíð (sem var í ökumannssætinu) og Solla var á leið á skurðarborðið.

Það er margt sem á eftir að koma á yfirborðið.  Það hlýtur að ganga eitthvað á þegar 180 milljarða eignatilfærsla á sér stað. Hér er margt óútskýrt.

Hvernig sem svo fer þá mun Landsbankinn nú eignast Glitni fyrir örlítð brot af því sem hefði fyrir nokkrum dögum þótt sannvirði. Þeir sem tapa eru núverandi hluthafar, lífeyrissjóðir landsmanna og smærri hluthafar sem geymdu sparifé sitt og lífeyri í hlutabréfum í bankanum. 

Afleiðingar verða þær að traust almennings á hlutabréfum hefur beðið stórkostlegan hnekki þegar, að því er virðist, stöndugir bankar eru matreiddir á þennan hátt. 

[Smásálin (IP-tala skráð) 30.9.2008 kl. 14:47]

Eru allir búnir að gleyma hvar Welding starfaði áður en hann var keyptur til Glitnis?

[Haukur Nikulásson, 30.9.2008 kl. 17:36]

Kristinn, sagan segir að Glitnir hafi beðið um 15 milljarða að láni. Það gat Seðlabankinn auðveldlega ef Davíð vildi það. Um það þarf enginn að efast. Finnst þér svo ótrúlegt að Davíð hafi ekki komið auga á tækifærið fyrir Kjartan og Björgólf vini sína?

Samruni bankanna mun staðfesta þetta einfalda plott. Meira að segja ég hef skipt um skoðun á þessu máli sem ég hélt að væri runnið undan einskærri góðmennsku Davíðs og velvild í garð helstu hluthafa Glitnis.

Fjarvera Geirs og Sollu erlendis dögum saman segir okkur líka að þau og ríkisstjórnin komu hvergi að frágangi þessa máls nema til að stimpla þetta rétt í restina fyrir bláa skuggann. 

[Haukur Nikulásson, 30.9.2008 kl. 20:00]

Kristinn, það var ekki beðið um lán hjá ríkissjóði heldur Seðlabankanum. Hann hefur það hlutverk gagnvart viðskiptabönkunum. Það hefur líka komið fram víðar í dag að Seðlabankar hafi lánað viðskiptabönkum í öðrum löndum og þessi leið var því vel fær.

Það er að verða skoðun sífellt fleiri að Davíð sé að misnota vald sitt til að færa milljarða á frá fólki sem honum er illa við og til fólks sem honum er vel við. Það voru aðrir kostir í stöðunni sem hefðu verið í stíl við aðgerðir erlendis. 

Með þessu hefur Davíð með illkvittnislegri aðgerð tekist upp á eigin spýtur að veikja stórkostlega gengi krónunnar með tilheyrandi verðbólguáhrifum og vantrausti innlendra fjárfesta og erlendra matsfyrirtækja og lánastofnana. Ég held að ég skjótist sem snöggvast í hóp þeirra sem telja að hann sé búinn að sanna sig sem sjálfstætt efnahagsvandamál íslensku þjóðarinnar.

Það virðist líka vera sem svo að leiðtogar stjórnarandstöðunnar hafi fengið svolítið sérkennilega mynd af málinu frá Davíð og félögum til að fá þá til að samþykkja gjörninginn. Þeir munu vonandi sjálfir tjá sig um það.

[Auðun Gíslason, 30.9.2008 kl. 22:10]

Merkilegt að Sjálfstæðisflokkurinn skuli standa að svona atlögu að einkaeignarréttinum.  Reyndar á fjárveitingarvaldið eftir að samþykkja þennan gjörning, þ.e. Alþingi.

[Gunn (IP-tala skráð) 1.10.2008 kl. 21:58]

Ég myndi ekki kokgleypa svona massívan áróður frá FL-"ENRON" nú Stoðir genginu sem beita öllum brögðum til að losna úr þessari klemmu. Tel að efnahagsástandið væri mun verra ef Glitnir færi í þrot.

Í raun tel ég að fall krónunnar á rætur að rekja til gríðarlegs fjárlagahalla á Fjárlögum sem ennþá rýrir trú aðila á krónunni. Illt að hafa ekki þrek til að hafa hallalaus fjárlög á þessari ögurstundu íslensks efnahags.

Vandamál Íslendinga er gríðarleg skuldasöfnun einstaklinga og fyrirtækja og ríkisstjórnir sem hefur verið of ragar að slá niður þessi þennsluáhrif.

Glitnir banki hafði ekki rekstrarfé og getur ekki fjármagnað sig.  Eigendur eru kolskuldsettir og eru að komast í þrot.  Að lána þessu "liði" gjaldeyrisforða Íslands á þessum tíma er óráðlegt að flestra mati og aðgerð Seðlabankans eftir bókinni. Þið eruð væntanlega búinn að sjá FL-group myndböndin á YouTube sem sýnir aðferðir þessara "fjármálasnillinga"

http://www.youtube.com/watch?v=nQygPZZqg_M

http://www.youtube.com/watch?v=ryzSRYK4Pec

Ég hef nú aldrei verið neinn aðdáandi Davíðs Oddsonar en mér blöskrar þetta hann kemur sem sá eini sem þorir að standa á bak við nauðsynlegar aðgerðir en ríkisstjórnin skýli sér á bak við hann og Samfylkingin hún þorir ekki að opna munninn, ...svei attan.  Þessa ímynd kokgleypir síðan þjóðin.

[Karl (IP-tala skráð) 12.10.2008 kl. 18:18]

 Sæll Hallur

Það væri fróðlegt að skoða til samanburðar ef Glitnir og síðar Landsbankinn hefði fengið neyðarlán frá Selabankanum.

Hvað það hefði kostað og síðan hvað þessi atburðarrás hefur kostað Þjóðina.  Hefði ekki verið ódýrara að fleyta bönkunum yfir þennan hjall þar til kreppan gengur yfir.  Mig grunar að versta leiðin hafi verið farin.