Bömmer! Gígja hætt að vinna á Furuborg!

Gígja "fóstra" er hætt að vinna á Furuborg eftir 15 ára farsælt starf sem leikskólakennari. Væntanlega búin að fá nóg af launastefnu samfélagsins! 

Þetta er mikill skaði fyrir Grétu mína og hina krakkana á Furuborg.   Eiginlega algjör "bömmer" svo ég sletti smá! 

Reyndar dáist ég að úthaldinu hjá Gígju og öðrum öflugum leikskólakennurum sem hafa þraukað ár eftir ár á hugsjóninni og starfsánægjunni einni saman. Því ekki eru það launin sem laða gott fólk að!

Ég óttast að við eigum eftir að sjá á eftir fjölda góðra starfsmanna úr umönnunarstéttunum og kennarastéttunum á næstu mánuðum - þrátt fyrir yfirvofandi atvinnuleysi sem OECD hefur spáð á Íslandi - en slíkt atvinnuleysi hefur verið einkenni ríkisstjórnartíðar Sjálfstæðisflokks og Samfylkingar - áður Alþýðuflokks - gegnum tíðina.

Það voru falleg orðin sem ríkissjórnin hafði um að rétta hlut kvennastéttanna í samfélaginu - en skilaboðin sem Árni Matthiesen á Kirkjuhvoli og ríkisstjórnin senda nú hjúkrunarfræðingum gegnum samninganefnd sína - boða ekki gott! 

Vonandi eigum við ekki eftir að sjá á eftir mörgum "Gýgjum" á næstunni - en ef við ætlum að halda þeim í faglegri vinnu með börnunum okkar - þá verður að umbuna "Gýgjunum" í launum!

Þá verður Árni á Kirkjuhvoli líka að tryggja hjúkrunarfræðingum eðlileg kjör - annars gæti félagi hans Gulli í heilbrigðisráðuneytinu lent í enn verri vanda en hann hefur þurft að glíma við til þessa!

Gígja og allir hinir fullorðnu snillingarnir á Furuborg!  Takk fyrir frábært starf með yngri börnin mín þrjú á undanförnum 8 árum!

Athugasemdir

[Elfa (IP-tala skráð) 5.6.2008 kl. 17:23]

Vá ég er sko ekki hissa þó þú sért svekktur yfir því að hún Gígja sé að hætta ég nefnilega passaði börnin hennar tvö og kynntist henni því vel. Alveg hreint frábær manneskja og leikskólakennari og börnin hennar yndisleg.

[María (IP-tala skráð) 5.6.2008 kl. 21:44]

Það er ótrúleg forgangsröðin hjá stjórnmálamönnum þessarar þjóðar. Léleg laun til kennara, leikskólakennara og hjúkrunarkvenna... hvað ef þau hætta öll að vinna hvar erum við þá stödd? En það eru til nægir peningar fyrir óperum, glæsilegum eftirlaunum fyrir stjórnmálamenn, varnarmálaráðuneyti, einkaþotum....