Skynsamleg Framsóknarmennska ergir Björn Bjarnason!

Skynsamlega Framsóknarmennska virðist ergja Björn Bjarnason - þennan ágæta stjórnmálamann sem ég ber mikla virðingu fyrir. Honum gremst sú staðreynd sem ég hef ítrekað bent á að Barack Obama forsetaframbjóðandi Demókrata í Bandaríkjunum er í raun gegnheill Framsóknarmaður!

Þá ergir það Björn að forsvarsmenn Samtaka atvinnulífsins og forsvarsmenn ASÍ haga sér eins og Framsóknarmenn þessa dagana - eins og ágætur formaður Framsóknarflokksins Guðni Ágústsson benti á í grein í gær.

Reyndar verð ég að leiðrétta Guðna minn smá - aðiljar vinnumarkaðarins eru nefnilega sammála um að króna sé búin að vera - og vilja taka upp Evru. Að vísu er meirihluti Framsóknarmanna sammála þessu - en harður minnihluti flokksins er á annarri skoðun. Framsóknarmenn eru klofnir í afstöðunni til Evru - líkt og allir aðrir flokkar - utan Samfylkingar - sem ganga myndi í Evrópusambandið hvernig sem aðildarsamningar litu út!

Staksteinar Morgunblaðsins fjallar um þetta ergelsi Björns í sunnudagsblaðinu í dag.

Barack Obama er gegnheill Framsóknarmaður!

Hreint æðisleg Upplyfting!

Það var hreint æðisleg upplyfting að hlusta á Upplyftingu á Bifröst! Fyrst frábærir tónleikar og síðan ball sem lengi verður í minnum haft!  Þetta var bara tímamóta endurkoma Upplyftingar - "strákarnir" aldrei betri!

Spiluðu helling af nýjum lögum eftir stórsnillinginn Jóhann G. Jóhannsson tónlistarmann og myndlistarmann - sem náttúrlega var á staðnum - í gamla hátíðarsalnum á Bifröst!

Ég heimta bara nýja plötu með strákunum.

Get fullyrt að hinn ljúfi og hæfi stjórnmálamaður Magnús Stefánsson - bassaleikari Upplyftingar - hefði fengið 99,9% atkvæða þeirra sem voru á Bifröst - ef það hefði verið kosið í gær!

Magnús er náttúrlega svo mikill og góður "Traustur vinur!".

En svona án gríns - fyrst ég datt í pólitíkina - þá er Magnús Stefánsson einn heilsteyptasti og besti þingmaðurinn okkar - eins og sjá má á reglulegum pistlum á vefsíðunni hans!