"Fátt verðmætara trausti og trúverðugleika!" segir Geir Haarde af öllum!!!

Það var nánast hjákátlegt að heyra Geir Haarde forsætisráðherra segja "fátt verðmætara trausti og trúverðugleika!" í þjóðhátíðarræðu sinni á Austurvelli. Auðvitað er þetta rétt hjá Geir. Ég og mikill meirihluti þjóðarinnar treysti ríkisstjórn Geirs Haarde og Ingibjargar Sólrúnar þegar hún tók við. Þjóðin taldi hana líka trúverðuga.

En á örskömmum tíma hefur Geir og ríkisstjórn hans misst traust þjóðarinnar og trúverðugleiki hennar er fokinn út í veður og vind. Aðgerðarleysið í efnahagsmálum algert - og þjóðarskútan rekur um stjórnlaus í skerjagarðinum.

Þá kemur kapteininn og segir "fátt verðmætara trausti og trúverðugleika!" Það dugir ekki. Það þarf að taka á stýrinu og stýra en ekki láta reika á reiðanum eins og Geir hefur gert að undanförnu.

Það var fleira sem hljómaði ekki við hæfi. Geir sem hefur ekki gert neitt og ekki lagt neitt á sig vitnaði í spakleg orð Bjarna Benediktssonar í gamalli 17. júní ræðu: "Fátt næst fyrirhafnarlaust".

Það kæmi  mér ekki á óvart að Sjálfstæðismenn séu farnir að svipast um eftir eftirmanni Geirs.

Allt að 50 þúsund manns í miðborginni í dag

Gefandi ljósmóðurstarf þýðir ekki að gefa skuli vinnu sína!

Ljósmæðrastarfið ku vera afar gefandi starf. Það er að segja í flestu öðru en laununum. Kannske hafa stjórnvöld misskilið hugtakið "gefandi starf". Talið það þýða að þeir sem vinna "gefandi starf" gefi vinnuna sína. Allavega gefa ljósmæður stóran hluta vinnu sinnar ef tekið er mið af launakjörum þeirra.

Ég er ekki viss um að allir átti sig á því að nýútskrifaðar ljósmæður hafa lokið 6 ára ströngu námi. Fyrst fjögur ár sem almennir hjúkrunarfræðingar og síðan tvö ár til viðbótar til að sérhæfa sig sem ljósmæður. Allavega virðast stjórnvöld ekki áttað sig á því.

Margar útskrifaðar ljósmæðir virðast ekki endast lengi í ljósmóðurstarfinu vegna launanna. Fara jafnvel að vinna sem hjúkrunarfræðingar en ekki sem ljósmæður vegna þess að laun hjúkrunarfræðinganna eru skömminni skárri. 

Það segir allt um slæm launakjör ljósmæðra því eins og allir vita þá eru launakjör hjúkrunarfræðinga ekki til þess að hrópa húrra fyrir. Enda ekki unnt að fullmanna stöður hjúkrunarfræðinga vegna lágra launa. Þær eru því líka í "gefandi starfi" eftir skilningi stjórnvalda.

Ég er það lánsamur að hafa tekið á móti börnunum mínum fjórum. Tja, ekki kannske beinlínis - en verið viðstaddur fæðingu þeirra. Þar af einn keisaraskurð. Verið með barn á vökudeild í viku. Hef því nokkra innsýn í störf ljósmæðra.  Mér finnst þær frábærar. Mér finnst að þær eigi að fá laun í samræmi við það - og í samræmi við menntun sína og ábyrgð.

Hjúkkurnar líka!

Það ætti ekki að vera erfitt fyrir ríkisstjórn sem sagði í stjórnarsáttmála að hún ætlaði að endurmeta sérstaklega kjör kvenna hjá hinu opinbera, einkum þeirra stétta þar sem konur eru í miklum meirihluta.

Halló þið í stjórnarráðinu!

Ljósmæður eru kvennastétt! Hjúkrunarfræðingar eru kvennastétt! Hvað eruð þið að hugsa?

Þarf fréttastofa Stöðvar  2 kannske að minna ykkur á þetta stefnumál ykkar - daglega?

Fjörutíu prósent ljósmæðra munu hætta