Hnýtið saman Samfylkingu og Vinstri græna

Endilega hnýtið saman Samfylkingu og Vistri græna. Það yrði spennandi kostur ef Vinstri grænir og Samfylking gengju bundin til kosninga. Slíkt hefur ekki tíðkast í langan tíma. 

Væntanlega yrði gengið frá því fyrirfram hver yrði forsætisráðherraefni slíkrar stjórnar.

Hvort ætti það að vera Steingrímur J. eða Jóhanna?

Ég er hins vegar ekki viss um að slík stjórn yrði farsæl ef Framsókn yrði ekki með - framganga minnihlutastjórnarinnar undanfarið lofar ekki allt of góðu - það vantar dálítið jarðtenginguna.

 

Samfylkingin gangi bundin til kosninga

Ólafur F. Magnússon ræðst á starfsfólk Ráðhússins!

Það var sorglegt að horfa á Ólaf Friðrik Magnússon borgarfulltrúa ráðast á afar ósmekklegan hátt á starfsfólk Ráðhúss Reykjavíkur með dylgjum og óhróðri úr ræðustól borgarstjórnar. Ólafur F. sakaði starfsfólk í ráðhúsinu um óheiðarleika.

Borgarstjóri kom starfsfólkinu til varnar og bað Ólaf F. að ráðast ekki að starfsfólki úr ræðustól borgarstjórnar þar sem starfsfólk gæti ekki varið heiður sinn. Við það færðist Ólafur F. í aukanna og bætti í árásirnar á starfsfólkið.

Ég hef aldrei áður séð ósmekklegri aðför að starfsfólki Reykjavíkurborgar úr ræðustól borgarstjórnar, en ég fylgdist með nánast öllum borgarstjórnarfundum tímabilið 1986-1991 þegar ég var varaborgarfulltrúi. Þá hef ég fylgst með útvarpssendingum af borgarstjórn af og til undanfarin misseri - en brá mér á pallana í dag - þar sem ég trúði ekki mínum eigin eyrum og augum þegar Ólafur F. hóf nánast að svívirða starfsfólk Ráðhússins.  Hef þó heyrt ýmislegt vafasamt frá manninum.

Ekki veit ég hvað manninum stóð til - en má vera að Ólafur F. hafi átt dálítið erfitt eftir að fyrri dylgjur hans og ásakanir í garð borgarfulltrúa Framsóknarflokksins voru hraktar hver á fætur annarri - og flett ofan ásökunum Ólafs F. svo ekki stóð steinn yfir steini.

Á fundinum var meðal annars farið yfir nokkrar móttökur sem Samfylking, VG og Sjálfstæðisflokkur hafa haldið sambærilegar þeim sem Óskar Bergsson borgarfulltrúi Framsóknarflokksins hélt á haustmánuðum - og sýna svart á hvítu að Óskar fór eftir reglum og hefðum í borgarstjórn með móttöku sinni.

Reyndar hjólaði Ólafur F. einnig í fyrrum samstarfskonu sína - Margréti Sverrisdóttir - og vildi reka hana út úr borgarstjórnarsalnum - og í borgarstjórann Hönnu Birnu Kristjánsdóttur þar sem hann setti fram órökstuddar dylgjur.

Hvet fólk til að fylgjast með ræðum Ólafs Friðriks í borgarstjórn. Þær eru oft á tíðum afar athyglisverðar svo ekki sé meira sagt.

4100 fá sumarstarf hjá borginni

Slysagildran á Kjalarnesi og slæmt ferðaveður

Þegar ég heyri tilkynningar um að ekki sé ferðaveður þá leitar hugurinn einatt upp á Kjalarnes þar sem oft blæs hressilega og umferðin er þung. Þar skapast mikil hætta í slæmu skyggni og hálku enda liggur Vesturlandsvegurinn þröngur og dimmur í jaðrinum á byggðinni. Þar liggja einnig fjölmargir stórhættulegir afleggjarar að Vesturlandsveginum þar sem umferð er afar þung og hröð.

Reyndar þarf ekki slæmt veður til þess að skapa óásættanlega hættu á umferðaslysum á Kjalarnesi. Það er ekki síður hætta í góðu veðri þegar ökumenn aka greitt og umferðin er þung. Þá má sjá börn og unglinga sem leið eiga yfir Vesturlandsveginn skjótast á harða hlaupum rétt á meðan aðeins lengist bilið á milli bílana.

Ég fæ reyndar hnút í magan við tilhugsunina. Þarna hafa orðið slys og við viljum ekki fleiri slík.

Þá er ég kominn að kjarna málsins.

Það verður að grípa til aðgerða á þessum kafla Vesturlandsvegarins áður en við upplifum enn eitt stórslysið.

Samgönguráðherra verður að setja þennan vegakafla í forgang, fela Vegagerðinni að hanna strax tvöföldun Vesturlandsvegarins á þessum slóðum og það þannig að greið leið verði undir - eða yfir Vesturlandsveginn fyrir gangandi vegfarendur við þéttbýliskjarnann - og umferð inn á Vesturlandsveginn skapi ekki stórhættu eins og hún gerir í dag.

Það verður að laga til á þessum slóðum - þrátt fyrir blankheit.

Ég veit að þetta verður ekki gert strax á morgun - það þarf lengri tíma til að hanna framkvæmdina og byggja upp góðan og öruggan 2x2 veg þar sem umferðaöryggi er tryggt.

En í millitíðinni - strax í sumar - er hægt að gera minni úrbætur við afleggjara við Vesturlandsveg - og að sjálfsögðu er unnt að skella upp göngubrú yfir Vesturlandsveg strax í sumar!

Ég skora því á  samgönguráðherrann að taka upp símann, hringja í Hönnu Birnu borgarstjóra til að tryggja hraðameðferð vegna þessara lagfæringa gegnum borgarkerfið - og hringja svo í Vegagerðina og fela þeim að klára málið hratt og örugglega.

Kjalnesingar eiga það skilið.

Ekkert ferðaverður á Vestfjörðum

Við veitum heimilislausum skjól

Þegar við Framsóknarmenn mynduðum nýjan meirihluta með Sjálfstæðisflokknum í borgarstjórn Reykjavíkur fyrir rúmu hálfu ári var það eitt af áhersluatriðum okkar í Velferðarráði að taka á vanda heimilislausra og ganga frá metnaðarfullri stefnu í málefnum utangarðsfólks. 

Á þeim tíma sem ég tók við sem varaformaður Velferðarráðs var í undirbúningi að Heilsuverndarstöðin tæki við þjónustu við allt að 20 manns - fólk sem glímt hefur við áfengis- og vímuefnavanda en eru í bata - þar sem áhersla  átti að vera á félagslegan stuðning og hæfing fyrir þátttöku í samfélaginu.

Deilur höfðu verið um aðkomu Heilsuverndarstöðvarinnar að verkefninu og því miður gat hún ekki staðið við húsnæðishluta verkefnisins. Því var það að Velferðarráð rifti samkomulagi við Heilsuverndarstöðina og gekk til samninga við SÁÁ um að taka að sér verkefnið.

Það var mikilvægt að mínu mati að samkomulag tækis við SÁÁ um þetta mikilvæga verkefni eins og kom meðal annars fram í bloggi mínu  Tímamótasamvinna Velferðarráðs og SÁÁ  á þessum tíma.

Gengið var frá samningi við SÁÁ um verkefnið. Þetta skref var mjög mikilvægt að mínu mati.

Nú - nær þremur mánuðum eftir að samkomulag náðist milli Velferðarráðs, Velferðarsviðs og SÁÁ um verkefnið - fór fram formleg undirskrift félagsmálaráðuneytisins og borgarstjóra vegna aðkomu ríkisins að verkefninu.  En gengið var frá þeirri aðkomu ríkisins fyrir rúmu ári síðan þótt ekki  hafi verið ákveðið að skrifa undir formlegt samkomulag og samning fyrr en nú - einhverra hluta vegna.

Ráðist gegn vanda heimilislausra

... en lætur stóru orðin sem vind um eyru þjóta

"Flokkurinn þolir stór orð" segir formaður "Endurreisnar Sjálfstæðisflokksins."

En er það nóg?

Ætlar flokkurinn bara að láta orðin sem vind um eyru þjóta? 

Þjóðin mun beina sjónum sínum á Sjálfstæðisflokkinn og fylgjast með því hvort flokkurinn muni taka mark á gagnrýninni - eða hvort hann haldi áfram á sömu braut hroka og afneitunar!

„Flokkurinn þoli stór orð"

Ingibjörg Sólrún og Jóhanna Sig sekar um vanrækslu sem ráðherrar

Ég get ekki annað séð en að Ingibjörg Sólrún og Jóhanna Sigurðardóttir - tvíeykið í forystu Samfylkingarinnar - hafi gerst sekar um alvarlega vanrækslu sem ráðherrar í síðustu ríkisstjórn þar sem þær brugðust ekki við aðvörun Alþjóða gjaldeyrissjóðsins vegna bankakerfisins!  

Af hverju í ósköpunum stungu þau Ingibjörg Sólrún og Geir Haarde höfðinu í sandinn og gerðu nákvæmlega ekki neitt í málunum?

Getur Jóhanna Sigurðardóttir firrt sig ábyrgð - ráðherrann sem heimtaði að ekkert yrði skorið niður hjá sér í fjárlagagerðinni - bara hinum ráðherrunum? Jóhanna var ráðherra í ríkisstjórn sem skellti skollaeyrum við aðvörunum - ríkisstjórn sem ber því fulla ábyrgð á bankahruninu!

Hvernig dettur Ingibjörgu í hug að halda áfram í stjórnmálum í stað þess að axla ábyrgð sína á klúðrinu sem nú er að sliga okkur öll og gefa öðrum sviðið eftir?

Meira að segja Geir Haarde og Árni Matthiesen eru búnir að taka pokann sinn. Ingibjörg og Jóhanna sitja einar eftir af þeim sem bera ábyrgð á að hafa ekki brugðist við viðvörunum!  Nei, reyndar Össur líka!

Telja þau að Samfylkingin þurfi aldrei að bera ábyrgð á mistökum sínum - bara hinir flokkarnir?

Er Jóhanna trúverðug sem framtíðarforsætisráðherra eftir að þessar upplýsingar koma fram?

Ber hún ekki ábyrgð á bankahrunsklúðrinu eins og aðrir ráðherrar síðustu ríkisstjórna?

IMF varaði við í apríl

Dagur B. næsti formaður Samfylkingarinnar

Dagur B. verður væntanlega næsti formaður Samfylkingarinnar. Það hefur verið rætt um það lengi að Ingibjörg Sólrún myndi ekki segja af sér formennsku fyrr en það væri tryggt að Dagur B. tæki við. Nú hefur Ingibjörg Sólrún gefið út að hún ætli að halda áfram sem formaður flokksins - en ekki forsætisráðherraefni.

Væntanlega mátu þau stöðuna þannig að Dagur B. myndi ekki hafa formannsembættið í beinni kosningu eins og staðan er nú.

Það kemur því ekki á óvart að Dagur B. skuli nú koma fram og lýsa yfir framboði til varaformanns Samfylkingarinnar. Ef hann nær því mun Ingibjörg Sólrún geta staðið upp við gott tækifæri og láta Dag B. Samfylkinguna eftir.

Vandamál Dags B. verður hugsanlega að hann er oddviti Samfylkingar í Reykjavík - en verðr ekki á þingi - nema hann bjóði sig fram í prófkjöri Samfylkingarinnar. En það gæti reyndar eins orðið að Dagur B. taki við sem ráðherra þegar Ingibjörg hættir - ef Samfylking verður í ríkisstjórn. Það er fordæmi fyrir því.

Árni Páll Árnason hinn snaggaralegi þingmaður Samfylkingarinnar berst nú á tveimur vígstöðvum. Annars vegar gegn vinsælum bæjarstjóra í Hafnafirði sem er með öflugan flokk Hafnarfjarðarkrata á bak við sig um 1. sæti framboðslista - og nú við Dag B. leiðtoga Samfylkingar í Reykjavík.

Ef Árni Páll hefir 1. sætið í Suðvesturkjördæmi - þá gæti hann orðið ógnun við Dag B. og Ingibjörgu Sólrúnu! Árni Páll er alveg maður í það - það hefur hann sýnt á Alþingi og víðar.

Dagur í varaformanninn

Kattarþvottur Sjálfstæðisflokks - stefnan brást líka - ekki bara fólkið

Þetta er óttalegur kattarþvottur Endurreisnarnefndar Sjálfstæðisflokksins.  Auðvitað brást stefna Sjálfstæðisflokksins - það var ekki bara fólkið sem var í framlínunni.

En það er rétt að það þarf að skipta um fólk í framlínunni ef Sjálfstæðisflokkurinn á að verða stjórntækur á ný. Það verður spennandi að fylgjast með endurnýjuninni.

En ég held að það væri gott bæði fyrir þjóðina og Sjálfstæðisflokkinn að flokkurinn taki sér gott - mjög gott frí frá landsstjórninni.

Stefna brást ekki, heldur fólk

Frábær skíðadagur í Bláfjöllum

Það var frábær skíðadagur með strákunum í Bláfjöllum í gær þar sem færið var til fyrirmyndar og veðrið yndislegt. Hvet alla til að nýta sér þá góðu aðstöðu sem í Bláfjöllum er - ekki skemmir gott veður fyrir - þótt ekki skíni sólin í dag eins og í gær.

Skíðasvæðin opin

Yfirhylming eða hefðbundin tregða embættismannakerfisins?

Yfirhylming eða hefðbundin tregða embættismannakerfisins - það er stóra spurningin!

Það voru skelfileg mistök af síðustu ríkisstjórn að setja ekki strax í október á fót embætti sérstaks ríkissaksóknara til að skoða bankahrunið - heimild dómsmálaráðherra til þess var til staðar.

Það hefði verið unnt að frysta eignir auðmanna sem grunaðir voru um saknæmt athæfi strax í nóvember ef ríkisstjórn Samfylkingar og Sjálfstæðisflokks hefði staðið sig í stykkinu. Það er til þess lagaheimild.

Nú óttast menn að sú töf sem varð á skipan sérstaks saksóknara hafi orðið til þess að auðmenn sem mögulega voru með óhreint mjöl í pokahorninu hafi bæði komið undan eignum og falið slóð sína.

Hægagangur í skilum á gögnum til nýskipaðs saksóknara er afar slæmur og lyktar í nefi almennings sem yfirhylming.

Almenningur treystir ekki lengur embættismannakerfinu enda virðist sem ákveðinn hluti þess sé framlenging af Sjálfstæðisflokknum eftir allt of langa samfellda valdatíð þeirra - eins og fram kom í yfirliti DV á dögunum - án þess ég sé að kasta rýrð á einstaka embættismenn.

Þekki það mikið til þess ágæta kerfis til þess að vita að langstærsti hluti embættismanna eru heiðarlegir, vinnusamir og leggja mikla áherslu á jafnræði og fagleg vinnubrögð - þótt sumir hafi fyrst hugsað um Sjálfstæðisflokkinn og síðan um þjóðina.

Það breytir því ekki að almenningur treystir embættismönnum ekki allt of vel eins og fram kemur í könnun Gallup um traust hinna ýmsu aðilja og stofnana í samfélaginu.

Þess vegna er það afar slæmt að það sé upplýsingatregða frá eftirlitsstofnunum til sérstaks saksóknara vegna bankahrunsins.

Það sem fyrst kemur upp í huga fólks er yfirhylming þó ég geri ráð fyrir að frekar sé um hefðbundna tregðu innan embættismannakerfisins að ræða.

Embættismannakerfið verður að bregðast við með því að skila málum og gögnum til ríkissaksóknarans eins hratt og vel og unnt er. Annars byggist upp alvarleg tortryggni sem erfitt verður að vinna bug á - hvað þá að endurreisa traustið.

Að lokum til þeirra sem væntanlega munu setja fram athugasemdir:

Já, ég veit að það eru fleiri en bara Sjálfstæðismenn í embættismannakerfinu!

Tregða við upplýsingagjöf