Almenn leiðrétting höfuðstóls íbúðalána og afborganir eftir greiðslugetu!

Það þarf almenna leiðréttingu á höfuðstól íbúðalána bæði lána sem taka mið af gengi erlendra gjaldmiðla og verðtryggðra lána. Þá þarf jafnframt að gefa fjölskyldum kost á að taka mið af greiðslugetu við afborganir af íbúðalánum sínum, eins og ég og Þórólfur Matthíasson höfum bent á.

Vek athygli á aðgerðum talsmanns neytenda sem nú hefur leitað til fjármálafyrirtækja um að sérstakur gerðardómur ákvarði forsendur leiðréttinga höfuðstóls. Einnig frétt þar sem hinn dugmikli talsmaður neytenda telur líklegt að gengisbundin lán séu bönnuð samkvæmt lögum.

Höfuðstóll lána verði lækkaður

Athugasemdir

[ólafur M. Jóhannesson (IP-tala skráð) 26.8.2009 kl. 09:28]

Kæri Hallur,

Undirritaður tók lán 1984 og lenti í margvíslegum hremmingum. Hefur alltaf borgað af láninu þrátt fyrir að stundum stæði fjölskyldan á hengibrún. Þá voru engar lánalengingar eða nein önnur úrræði í boði og hópur nágranna minna í Grafarvogi missti húsnæðið. Er það eitthvert réttlæti, ganvart okkur sem alltaf höfum borgað áratugum saman, að fella núna niður hluta skulda á tímum  lánalengina og annarra úrræða. Húsnæðisverð mun fara upp og þá breytist það tímabundna vandamál.

[Hallur Magnússon, 26.8.2009 kl. 09:41]

Ágæti Ólafur.

Er það eitthvað réttlæti að stór hluti fjölskyldnanna í landinu fá ekki eðlilega leiðréttingu á höfuðstól íbúðalána vegna þess að fólk hefur áður lent í erfiðleikum vegna verðbólgu og þá var ekki gripið til þess ráðs að aðstoða fjölskyldurnar?

Er það réttlæti að við - kynslóðin sem hefur greitt allt fullu verði - húsnæðislán og námslán - greiðum það fullu verði á meðan kynslóðin á undan greiddi ekkinema hluta þar sem lánin brunnu upp í verðbólgubáli fyrri tíma?

Svona getum við haldið áfram.

Það er klént að beita sér gegn nauðsynlegum aðgerðum nú - vegna þess að fólk hafi ekki fengið réttmæta leiðréttingu í fortíðinni.

En takk fyrir ágætt komment!

[Lúðvík Júlíusson, 26.8.2009 kl. 10:07]

óttastu ekki að gengisfall krónunnar og verðbólga sem fylgir í kjölfarið taki allan ávinning til baka?  Hvernig er hægt að koma í veg fyrir þessa hliðarverkun?  -  Þeir græða mest sem eiga eignir erlendis og hafa tekjur í erlendri mynt.... eigum við að taka þátt í að gera þessa einstaklinga ríkari?

[Neytandi (IP-tala skráð) 26.8.2009 kl. 11:34]

Sæll Hallur,

Ég er einn þeirra sem er með hluta skulda í erlendri mynt.  Ég hef ágæta greiðslugetu og hef greitt af lánum án þess að fara í greiðsluaðlögun eða annað slíkt.

Hinsvegar er langlundargeð margra brostið og mitt þar á meðal.  Við þurfum að fá framtíðarlausn á þessum erlendu lánum.  

Uppreikningar á erlendum lánum miðað við verðtryggingu og rétt ríflega það ætti að geta gagnast flestum því það er höggið sem flestir reiknuðu með að gæti komið fram í erlendum lánum, sbr. gengisþróun síðustu 10 - 15 ár.  ávinningurinn fólst í því ef gengisbreyting yrði minni.  Þessar hamfarir sem nú ganga yfir ráða fáir yfir að brúa.

Ef það á að miða lagfæringu eingöngu við greiðslugetu þá er að mínu mati voðinn vís.  Þú hefur vinnu í dag, en hvað með morgundaginn ? 

Þú hefur litla greiðslugetu í dag, ert atvinnulaus, námsmaður nýskriðinn úr skóla o.s.frv.  Hver verður þín greiðslugeta eftir 1,2 eða 5 ár ??

Að mínu mati þarf að stilla uppgjöri á lánum á eftirfandi máta. 

Elendu lánin séu færð niður miðað við vísitölu + eitthvað álag.  Það standi öllum til boða. 

Ef það dugar ekki til þá þarf að miða við veðsetningu og horfa til að hámarki 110 - 120% veðsetningar á markaðsvirði.

Að lokum ef það dugar ekki til þá þarf að horfa til greiðslugetu.

Við megum ekki gleyma greiðsluviljanum en það þarf að vera hvati til að greiða af lánunum.  Ef þú sérð fram á "skuldafangelsi" næstu árin og áratugina þrátt fyrir greiðslugetu þá keyrir fólk sig einfaldlega í þrot.