Ný ríkisstjórn fari í aðildarviðræður við Evrópusambandið

Ný ríkisstjórn á að sjálfsögðu að fara í aðildarviðræður við Evrópusambandið. Það er fullkomlega rétt hjá forseta ASÍ.  Það er ábyrgðarleysi að fara ekki í slíkar viðræður.

Þar með er ekki sagt að Ísland eigi að ganga í Evrópusambandið.

Sú ákvörðun á að vera þjóðarinnar í þjóðaratkvæðagreiðslu þegar niðurstöður aðildarviðræðna liggja fyrir.

Þess vegna

verða stjórnmálafokkarnir að setja fram skýr samningsmarkmið fyrir komandi kosningar svo kjósendur geti tekið tillit til þeirra þegar gengið er til kosninga.

Framsóknarflokkurinn hefur þegar gengið frá sínum skilyrðum. Þau samningsmarkmið eru skýr og góð fyrir þjóðina. Það er enda lykilatriði að Framsóknarflokkurinn komi að viðræðum við Evrópusambandið því engum er betur treystandi til að tryggja hagsmuni þjóðarinnar.

Samningsmarkmið sem Framsóknarflokkurinn vill hafa að leiðarljósi er að finna hér í ályktun flokksþings.

ASÍ: Ný ríkisstjórn fái umboð til ESB viðræðna

Athugasemdir

[Arnar Geir Kárason (IP-tala skráð) 5.3.2009 kl. 11:04]

Ef framsókn er núna á þeim buxunum að fara að hefja viðræður við ESB þá er atkvæðið mitt svo gott sem farið frá þeim.  Það er ekkert eftir nema að kjósa x-D aftur.

Annars þá sé ég bara ekki nokkuð gott við það að ganga inn í ESB.  Við megum ekki gleyma því að hvort sem við fáum einhverjar undanþágur eða hvað að þá væri okkar atkvæði ekki nema dropi í hafið ef þeir myndu vilja breyta þeim ákvæðum sem samið væri um.

[Hallur Magnússon, 5.3.2009 kl. 11:23]

Arnar Geir.

Það er eitt að ganga til viðræðna - annað að samþykkja inngöngu. 

Það er ófært að umræðan sé á nótunum "ég held..."  hún þarf að byggja á staðreyndum.

Ef aðildarsamningur að ESB er Íslendingum hliðhollur og bætir stöðu okkar - er þá ekki ástæða til að skoða málið?

Ef aðildarsamningur er ekki ásættanlegur - þá göngum við bara ekki í Evrópusambandið´

Þetta er kjarni málsins.

[Arnar Geir Kárason (IP-tala skráð) 5.3.2009 kl. 11:49]

Að sjálfsögðu ef það væri þjóðini í hag að ganga inn í sambandið þá væri það rétt skref.

Ég er hinsvegar þeirrar skoðunar og fullkomlega sannfærður um það að ESB sé þjóðini ekki í hag.

Fjölmiðlar hafa hinsvegar ekki gert neitt annað en að vegsama ESB og samfylkingarmenn halda því statt og stöðugt að ESB sé lausn á öllum okkar vandamálum.

Það er líka hrikalega hræsni að segja nei við viljum ekki fara í ESB þegar allt gengur í blóman og svo þegar syrtir í álin að koma hlaupandi til ESB.  Það segir sig soldið sjálft að við höfum ekki mikið bitastætt til að semja um til þess að fá einhver sérkjör nema sjávarútveginn og hugsanlegar olíuauðlindir á drekasvæðinu.

Ef að við fáum enginn sérkjör þá verða innan nokkurra ára þegar aðlögunartímabili okkar lýkur fiskimið okkar aðgengileg öllum í ESB sambandinu.  Hvaða áhrif heldurðu að það muni hafa á efnahag okkar ?

Það þarf að skapast meiri stöðugleiki og sátt í samfélaginu áður en við getum farið út í þessar viðræður.  Þetta er það stór ákvöðrun að þetta þarf að ræða og hugsa í meira heldur en viðræður og svo atkvæðagreiðsla í þessu ástandi.

Hugsanlega aðild að evrópusambandinu myndi ég vilja setja á 10 ára plan.  Þetta er ekki eitthvað sem að við ættum að hlaupa inní. Því þetta er enginn lausn á vandamálum okkar.  Þú hlýtur að skilja hvað ég er að fara.

[Hallur Magnússon, 5.3.2009 kl. 13:30]

Ég vildi einmitt fara í aðildarviðræður í styrkleika - en svo fór það eins og það fór!

[Arnar Geir Kárason (IP-tala skráð) 5.3.2009 kl. 13:50]

Hefðum við verið innan ESB þá værum við í sama ástandi, nema hugsanlega hefðum við haft Evru þá væru erlendu lánin ekki að gera útaf við fólk.

Annars væri ástandið nákvæmlega það sama.

Þá hefðum við líka engann möguleika á að afskrifa eitthvað af skuldum.  Og yrðum neydd til að taka á okkur skuldbindingar varðandi IceSave og fleira.

Ef það hefði verið eitthvað bein í nefinu á Geir hefði hann sagt þvert NEI.  Eins og horfir nú þá stefnir allt í að þetta lendi á þjóðinni eftir allt saman.

Annars er ég þeirrar skoðunar að við eigum að fara í aðildarviðræður en það er ekki tími fyrir það núna né á næsta kjörtímabili.