Samruni Háskólans á Bifröst og Keilis - undir merkjum Bifrastar!

Samruni Háskólans á Bifröst og Keilis undir merkjum Bifrastar er áhugaverður og farsæll kostur!

Ekki einungis fyrir hinn öfluga háskóla á Bifröst og hins merkilega framhaldsskóla Keilis -  sem starfar undir slagorðinu - miðstöð vísinda, fræða og atvinnulífs - heldur einnig fyrir menntakerfið í heild sinn og þar af leiðir Íslendinga alla!

Ég viðraði þessa hugmynd á samruna skólanna undir heitinu Bifröst háskóli - Bifröst University- í ræðu minni á Hollvinadegindum á Bifröst þar sem ég sem formaður Hollvinasamtaka Bifrastar afhenti skólanum að gjöf málverkið Vígsluna. 

Ég hef fengið þónokkur viðbrögð - og nær undantekningarlaust jákvæð!

Ég vil því ítreka áskorun mína til stjórna og lykilstjórnenda þessara skóla til að skoða málið af fullri alvöru og hefja viðræður.  Ég er reiðubúinn til þess að hafa milligöngu um þær viðræður ef menn óska þess.

Hér á eftir fer sá bútur ræðu minnar þar sem ég hvatti til samruna:

"Fyrst ég er farinn að tala um framtíðina vil ég nota tækifærið og koma á framfæri skoðun minni um æskileg næstu skref í þróun Háskólans á Bifröst.

Mín skoðun er sú það væri farsælast fyrir Háskólinn á Bifröst og samhliða því íslenskt samfélag – að Háskólinn leiti samstarfs við Keili – miðstöð vísinda, fræða og atvinnulifs -  með það að markmiði að sameina skólana í eina, fjölbreytta háskólastofnun – undir heitinu:

Bifröst háskóli.  Enska heitið yrði Bifröst University.

Ég skora á stjórn Háskólans á Bifröst að taka þessa hugmynd á lofti og hefja viðræður við forsvarsmenn Keilis um samstarf og mögulegan samruna.

Gjöf Hollvinasamtaka Bifrastar – “Vígslan” - gæti orðið jafn táknræn fyrir slíka samvinnu og samruna á næstunni – eins og  “Vígslan” er táknræn fyrir þau merku og framsæknu skref sem stjórnendur skólans hafa tekið á hverjum tíma í takt við þróun íslensks samfélag sog uppskorið glæsilegan Háskóla á Bifröst.

Háskóla sem þarf að byggja á framsækinni og metnaðarfullri arfleið sinni – og aldrei standa í stað."

Athugasemdir

[Sigurgeir Jónsson, 21.9.2008 kl. 11:34]

Mér er það ekki kunnugt að háskólar reki útibú.Þó getur það verið.En mér finnst það ekki sanngjarnt að Suðurnesjamenn fari að gleypa háskóla borgfirðinga.Keilir er ekki heldur einkarekinn skóli, svo ekki er hægt að sjá að stjórnendur skólans hafi vald til að semja um samruna.En samstarf skóla í gegnum fjarkennslu er alltaf að aukast.Líka blasir það við að það er betra að hafa færri góða háskóla en marga lélega sem útskrifa lélega nemendur.

[Sigurgeir Jónsson, 21.9.2008 kl. 11:52]

Þessu til viðbóta þá er Keilir aðeins á byrjunarstigi eins og þú veist. Það er trú suðurnesjamanna að Keilir geti orðið einn af stærstu og bestu háskólum landsins, og skapi festu í byggð á suðurnesjum.Háskólarnir í þéttbýlinu við Faxaflóann nema Keilir, eru í R.vík. þar sem nemendur sitja fastir í umferðarteppum á leið í skólann.Slíkt er ekki heilnæmt fyrir námsgetu nemenda.Framtíð Keilis er því björt hvað snertir aðsókn nemenda, og hæpið er að sveitastjórnarmenn á suðurnesjum teldu það til hagsbóta fyrir Keilir að honum verði stjórnað úr afdölum Borgarfjarðar.Enda hefir Bifröst spjarað sig,og eðlilegt er að hún líti til þeirra háskóla sem standa henni nær á rekstrarlegu sviði, svo sem Háskólans í R.vík.

[Haraldur Bjarnason, 21.9.2008 kl. 14:12]

Hvers vegna Hallur? - Saknið þið kannski Runólfs?

[Gunnar Axel Axelsson, 21.9.2008 kl. 16:24]

Þetta er góð hugmynd og vel þess virði fyrir alla aðila að skoða þennan möguleika a fullri alvöru. Bifröst byggir á sterkum grunni en þessi markaður hefur breyst mikið á undanförnum árum og það má öllum sem eitthvað til þekkja í háskólasamfélaginu hér á landi vera orðið ljóst að skólinn er of lítil eining. Menn hafa velt upp mörgum möguleikum varðandi framtíð skólans og þykist ég vita að sumir innan stjórnar hans hafi helst viljað hann sameinaðan Háskólanum í Reykjavík, en slíkt jafngildir auðvitað því að leggja skólann niður. Það veit ég líka að stjórnendur HR vildu allra helst sjá það gerast, enda eru menn búnir að fjárfesta mikið á þeim bænum og þurfa umfram allt að fylla deildirnar sínar til að það dæmi gangi upp.

Það er margt sem mælir með þessari hugmynd um sameiningu Keilis við Bifröst. Bifröst er háskóli en það er Keilir ekki. Það kæmi sér þó líklega mjög vel fyrir deildir Keilis að hafa slíkan stimpil og auka vaxtargetu þeirra verkefna til muna og flýta fyrir því að á suðurnesjum komist á háskólakennsla. Báðir skólar reka svokallaða frumgreinadeild eða háskólabrú eins og það er kallað af Keilismönnum og það eru samlegðaráhrifin augljós. Öll sú aðstaða sem er til staðar á starfssvæði Keilis myndi einnig gefa þeim verkefnum sem Bifröst er að sinna allt aðra möguleika og opna dyr sem stjórnendur þar hafa líklega ekki haft hugmyndaflug til að átta sig á að væru til. Samstarfið gæti til dæmis opnað á alveg nýjar víddir í fjarkennslu og tengsl við aljóðasamfélagið.

Háskólar byggja á þekkingu og mannauði en framtíð Bifrastar snýst ekki um persónur og allt tal um að menn sakni Runólfs eða Jóns Sigurðssonar eða eitthvað álíka er eitthvað sem menn eiga ekki að láta trufla góðar hugmyndir. Menn sem vilja sjá Bifröst áfram sem leiðandi afl í íslensku háskólasamfélagi þurfa að henda öllum fordómum og fyrirfram gefnum hugmyndum, Bifröst hefur alltaf verið brautryðjandi, farið nýjar leiðir og gripið ný og spennandi tækifæri.  Þannig verður það vonandi áfram.

[Haraldur Bjarnason, 22.9.2008 kl. 19:33]

Rétt hjá þér háskóli byggir á mannauði. Þess vegna held ég að Bifrestingar sakni Runólfs.