Talsmaður neytenda er talsmaður neytenda eins og Leiðarkerfi neytenda sannar!

Talsmaður neytenda er talsmaður neytenda - ekki bara embætti út í bæ!

Talsmaður neytenda sýndi það enn og einu sinni í dag - á Alþjóðadegi neytenda!

Neytendamálaráðherra, Björgvin G. Sigurðsson, opnaði í dag "Leiðarkerfi neytenda" sem er afar merkur neytendavefur sem Gísli Tryggvason, Talsmaður neytenda hefur haft forgöngu um að byggja upp. Vefslóðin er http://neytandi.is/ .

Það er með ólíkindum hve öflugt starf Talsmanns neytenda hefur verið í ljósi þess að hann hefur nánast verið einn í þessari baráttu.  Ég skora á Björgvin neytendamálaráðherra að styrkja embætti Talsmanns neytenda í næstu fjárlagagerð - og tryggja talsmanninum fjármagn til að ráða starfsfólki til embættisins - en talsmaðurinn stendur nefnilega einn í baráttunni!

Það má nefnilega ekki rugla saman embætti talsmanns neytenda við fjölmenna Neytendastofu - sem hefur allt annað hlutverk!

Það skiptir nefnilega máli fyrir neytendur á Íslandi að hafa áfram öflugan talsmann - og að honum verði gert kleift að bæta við sig verkefnum í þágu okkar allra - neytenda á Íslandi!

Athugasemdir

[Gunnar (IP-tala skráð) 14.3.2008 kl. 22:07]

Ég get bara ekki verið sammála um að þessi talsmaður neytanda hafi verið eitthvað svakalega öflugur.  Það heyrðist t.d nánast ekkert í honum þegar ásakanir um að lækkun VSK hefðu ekki skilað sér til neytanda komu á hendur verslunum og sérstaklega veitingahúsum.  Það var ASÍ sem bar það mál uppi. Einnig hefur hann ekkert látið í sér heyra varðandi það fáránlega kerfi sem uppboð á tollkvótum er á þessu landi, og hefur gert að engu tilraunir til að lækka verð á innfluttum landbúnaðar afurðum.  Steininn tók svo úr þegar gerð var könnun á því hvaða veitingastaðir hefðu skilað lækkun VSK til viðskiptavina og hverjir ekki, en talsmaður neytanda lagðist gegn því að birta listann og bar fyrir sig að það gæti skapað of mikinn glundroða í samfélaginu (orðrétt úr viðtali á Bylgjunni). 

Þessi vefur er svosem ágætur til síns brúks, hef ekkert út á hann að setja.  En að mínu mati á talsmaður neytenda að vera miklu meira áberandi og krafmeiri.

Mín skoðun....

[Hallur Magnússon, 15.3.2008 kl. 21:35]

Ágæti Gunnar!

Þetta er kjarni málsins!

Einn maður getur ekki gert allt - en hann hefur staðið sig frábærlega!

Miðað við að maðurinn er bara einn - þá hefur hann sýnt öfluga takta!

En það verður að styrkja embættið til þess að geta tekið á fleiri málum - ma. það sem þú bendir á!!!